किलियन एमबाप्पेले लियोनल मेस्सीलाई क्याम्प नाउमै छायाँमा पार्दै ह्याट्रिक पुरा गरेपछि पेरिस सेन्ट जर्माइनले च्याम्पियन्स लिग अन्तिम १६ को पहिलो लेगमा बार्सिलोनालाई लज्जास्पद हार चखाएको छ ।
मेस्सीले २७ औं मिनेटमै पेनाल्टीमार्फत गोल गर्दा गत सिजनको उपबिजेता पिएसजी अवे मैदानमा एक गोलले पछि परेको थियो । बार्साले खेललाई नियन्त्रणमा गर्ने अपेक्षा गरिएपनि फ्रान्सका बिश्वकप बिजेता एमबाप्पेले उत्कृष्ट प्रदर्शन गर्दै बिश्व फुटबलका सर्वकालीन महान खेलाडी मानिएका मेस्सीलाई छायाँमा पारे ।
गोल खाएको पाँच मिनेटपछि नै एमबाप्पेले क्लेमेन्ट लेँगलेटलाई छक्याउदै पिएसजीलाई खेलमा फर्काएका थिए । ६५ औं मिनेटमा १० यार्डबाट गोल गर्दै उनले खेललाई पिएसजीतर्फ मोडेका थिए । पाँच मिनेटपछि एभर्टनबाट लोनमा आएका इन–फर्म मोइजे किनले हेडरमार्फत अर्को गोल गरेपछि खेल पूर्ण रुपमा पिएसजीकै नियन्त्रणमै रह्यो ।
बार्सा अर्को गोलका लागि संघर्ष गर्दै गर्दा एमबाप्पेले काउन्टर अट्याकमा गोल गर्दै ह्याट्रिक पुरा गरेका थिए । दोश्रो लेग मार्च २० मा पेरिसमा हुनेछ र त्यो समयसम्म पिएसजी आफ्ना अर्का स्टार स्ट्राइकर नेमार पनि तिघ्राको चोटबाट फर्किने आशा गर्नेछ ।
यसअघिको ९ नकआउट खेलहरुमा मात्र एक गोल गरेका एमबाप्पेले मङ्गलवार आफ्नो भाग्यलाई भने पूर्ण रुपमा काया पलट गरेका थिए । फाउस्टिनो एस्प्रिला र आन्द्रे सेभेचेन्कोपछि पुर्व मोनाको फर्वार्ड एमबाप्पे च्याम्पियन्स लिगमा बार्साबिरुद्ध ह्याट्रिक गर्ने मात्र तेश्रो खेलाडी भएका छन् ।
युरोपियन प्रतिस्पर्धामा बार्सिलोनालाई उसकै घरमा हराउने पिएसजी मात्र दोश्रो फ्रेञ्च टोली हो । यसअघि बार्सा १९८४–८५ को कप विनर्स कपमा मेट्जसँग ४–१ ले हारेको थियो ।
खेलमा मेस्सीको लागि भने अर्को कोशेढुँगा पुरा भएको थियो । उनले लगातार १३ सिजन बार्सिलानोका लागि सबै प्रतियोगिता गरेर २० वा त्यो भन्दा बढी गोल गरेका छन् । यो सिजन उनको ला लिगामा १५ गोल रहेको छ ।
