राष्ट्रिय महिला लिगका दौरान घाइते भएकी साबित्रा भण्डारीको चोट गम्भीर भएको थाहा भएपछि उनी कम्तिमा एक बर्षको लागि मैदान बाहिर हुने भएकी छिन् ।
सोमबार नेपाल पुलिस क्लबबिरुद्धको खेलमा दायाँ घुँडामा चोट लागेपछि उनि दोस्रो हाफमा निक्लिएकी थिइन् । मंगलबार आएको रिपोर्टका अनुसार उनको घुँडाको एन्टेरिएर क्रुसिएट लिगामेन्ट (एसिएल) च्यात्तिएको देखिएको छ ।
रिह्याबिलिटेसनमा नै कम्तिमा पनि ६ महिना लाग्ने भएकाले उनी कम्तिमा पनि एक बर्ष मैदान बाहिर रहने छिन् ।
साबित्राले जारी राष्ट्रिय महिला लिगको १० खेलमा ४३ गोल गरिसकेकी छिन् । एपिएफले लिग च्याम्पियन बन्न बुधबार विराटनगर विरुद्ध जित हासिल गरे पुग्नेछ । लिगको अन्तिम खेल भने शुक्रबार आर्मी र एपिएफबीच हुनेछ ।
