१४ औं संस्करणको इन्डियन प्रिमियर लिग (आईपीएल) को मिनी अक्सनको लागि नेपाली राष्ट्रिय टोलीका आठ जना खेलाडीको नाम दर्ता भएको छ ।
अक्सनका लागि दर्ता हुने नेपाली खेलाडीहरुमा लेग स्पिनर सन्दिप लामिछाने, विकेट किपर ब्याट्सम्यान बिनोद भण्डारी, तिब्र गतिका बलरहरु सोमपाल कामी र करण केसी रहेका छन् । त्यस्तै युवा अलराउण्डर कुशल मल्ल, मध्यक्रमका ब्याट्सम्यान शरद भेषावाकर, तिब्र गतिका बलर अविनाश बोहरा र नेपाली राष्ट्रिय टोलीका उपकप्तान दिपेन्द्र सिंह ऐरी रहेका छन् ।
सन् २०१८ को संस्करणमा पहिलो पटक नेपालबाट आईपीएलको लागि आबद्ध भएका सन्दिप लामिछानेलाई यस पटक उनको टोली दिल्ली क्यापिटल्सले रिलिज गरेको थियो । जसले गर्दा उनी फेरी अक्सन मार्फत आईपीएलमा आबद्ध हुन पाउने छन् ।
करण, सोमपाल र कुशल हाल आबु धाबीमा जारी आबु धाबी टि-१० लिग खेली रहेका छन् भने भण्डारी, शरद, अविनाश र दिपेन्द्र पहिलो पटक विदेशी लिग खेल्ने दाउमा हुनेछन् ।
सन् २०२१ मा आयोजनाहुने आईपीएलका लागि हिजो (फेब्रुअरी ४ तारिख) सम्म आफ्नो नाम दर्ता गर्ने समय रहेको थियो । कुल १०९७ जना खेलाडीहरुले आफ्नो नाम दर्ता गराएकामा २८३ जना विदेशी खेलाडी रहेका थिए । यस पटक एसोसिएटबाट मात्र २७ जना खेलाडीले आफ्नो नाम दर्ता गराएका थिए ।
१४ औं संस्करणको आईपीएलका लागि आगामी फेब्रुअरीमा चेन्नाईमा मिनी अक्सन आयोजना हुनेछ । प्रत्येक टोलीले कुल २५ जना खेलाडी आफ्नो टोलीमा समावेस गर्न पाउने छन् । जसले गर्दा अक्सनमा आठ फ्रेन्चाइजहरुले कुल ६१ जना खेलाडीलाई आफ्नो टोलीमा समावेस गर्नेछन् । ६१ मध्य २२ जना मात्र विदेशी खेलाडीको छनोट गर्न पाउने छन् ।
