फ्रेञ्च स्टार किलियन एमबाप्पे पनि क्लबमै बस्ने आशा राख्दै ब्राजिलियन सुपरस्टार नेमारले आफू पनि पेरिस सेन्ट जमाईनमै बस्ने बताएका छन् ।
हालको सम्झौता २०२२ को अन्त्यमा समाप्त हुने बिषयमा क्लबको भविष्यलाई लिएर क्लब बोर्डसँग छलफल चलिरहदा २८ बर्षिय नेमारले आफू फ्रेञ्च महारथीसँगै बस्ने बताएका हुन् । “म अहिले निकै खुशी छु । यहाँ धेरै कुराहरु परिवर्तन भएका छन्,” टिएफवानलाई एक अन्तर्वार्ता दिदै नेमारले भनेका छन् । “किन म भन्न सक्दिन तर मलाई पिएसजीमा बस्दा निकै आनन्द आएको छ । म यहा शान्त र खुशी छु । म पिएसजीमै बस्न चाहन्छु ।”
बार्सिलोनाबाट संसारकै सबैभन्दा महँगो २ सय ६९ मिलिनय डलरमा ट्रान्सफर भएका नेमारले आइतबार दुई गोल गरेपनि पिएसजी फ्रेञ्च लिग वानमा लोरिएन्टसँग ३–२ ले स्तब्ध भएको थियो । यो नयाँ प्रशिक्षक मउरिसियो पोचेटिनाको आगमनपछि पिएसजीको पहिलो हार थियो ।
लगातार रियल म्याड्रिडसँग नाम जोडिदै आएपनि गत महिना आफूलाई सोच्नको लागि समय चाहिएको बताएका एमबाप्पे पनि पिएसजीमै बसेको नेमार चाहन्छन् । “म आशा गर्छु किलियन पनि यही बस्नेछन् । यो सबै समर्थकहरुको इच्छा पनि हो । हामी पेरिस महान टिम भएको हेर्दै यहाँ खेलिरहन र खुशी हुन चाहन्छौं,” नेमारले थपे ।
एमबाप्पेले यो सिजन सबै प्रतिस्पर्धाहरु गरेर पिएसजीका लागि १६ गोल गरिसकेका छन् भने चोटका कारण धेरै खेल खेल्न नसकेपनि नेमारले १३ गोल आफ्नो नाम लेखाएका छन् । “हाम्रो सम्बन्ध दाजुभाईको जस्तो छ । म ठूलो दाई जस्तो हु र उनीसँगै खेल्दै उनको सबैभन्दा उत्कृष्ट निकाल्न चाहन्छु,” नेमारले २२ बर्षिय एमबाप्पेबारे भने ।
नेमारको पछिल्लो अभिव्यक्ति किन पनि महत्वपूर्ण रुपमा हेरिएको छ भने उनले केही महिनाअघि बार्सिलोनाका अर्जेन्टिनी सुपरस्टार लियोन मेस्सी पनि सँगै खेल्ने र पिएसजीबाटै खेल्ने बताएका थिए । उनले उक्त अभिव्यक्तिलाई आफूले भन्देको मात्रै हो भनेर टार्न खोजेपछि गत सिजन बार्सिलोना छोड्ने संघारमा पुगेका मेस्सी पिएसजीसँगै जोडिएका थिए ।