बिग ब्यास लिग अन्तर्गत होबार्ट हरिकेन्सको समुह चरणको अन्तिम लिग खेलमा नेपाली राष्ट्रिय टोलीका लेग स्पिनर सन्दिप लामिछाने महँगो साबित भए भने विकेट बिहिन पनि रहे ।
चार ओभर बलिङ गरेका सन्दिपले ३५ रन खर्चिए भने कुनै पनि विकेट हात पार्न सकेनन् ।
होबार्टको लागि आठौँ ओभर लिएर आएका सन्दिपले आफ्नो पहिलो ओभरमा सात रन खर्चिए भने दोश्रो ओभरमा आठ रन दिए । तेश्रो ओभरमा उत्कृस्ट पुनरागम गरेका सन्दिपले पाँच रन मात्र खर्चिए पनि आफ्नो चौथों तथा अन्तिम ओभरमा दुई छक्का सहित १५ रन खर्चिन पुगे ।
सन्दिपले यस सिजनको बिग ब्यास लिगमा आठ खेल खेल्दै आठ विकेट हात पारे । अष्ट्रेलिया पुगे पछि अनिवार्य क्वारेन्टिन बस्न पर्ने नियमका कारण सुरुवात छ खेल गुमाएका सन्दिपले लिग चरणको बाँकी आठ खेल खेल्दै आठ विकेट मात्र लिन सफल भएका हुन् । बिग ब्यास लिगको अघिल्ला दुई सिजन मेलबर्न स्टार्सबाट खेलेका सन्दिप यस सिजन भने होबार्टमा आबद्ध भएका हुन् ।
मेलबर्न स्टार्स, पर्थ स्कोचर्स र सिड्नी सिक्सर्स विरुद्ध समान २-२ विकेट हात पारेका सन्दिपले मेलबर्न स्टार्स र सिड्नी थन्डर विरुद्ध १-१ विकेट हात पारे भने बाँकी तीन खेलमा विकेट निकाल्न सकेनन् ।
आजको खेलमा मेलबर्नसँग ११ रनले पराजित हुँदा सन्दिपको टोली होबार्ट पनि प्रतियोगिताबाट बाहिरिएको छ । सेमीफाइनल पुग्ने आशा जीवित राख्न जित्नै पर्ने खेलमा १५१ रनको मध्यम लक्ष्य सहित ब्याटिङमा आएको होबार्टले पुरै २० ओभर खेल्दै नौं विकेटको नोक्सानीमा मात्र १३९ रन बनाउन सक्यो ।