मिड टेबलबाट बाहिर निस्किने प्रयास गरिरहेको आर्सनल आफ्ना कप्तान पिएरे एमेरिक औबामेयाङ लयमा फर्किएपछि न्युकासल युनाइटेडमाथि शान्दार जित रच्न सफल भएको छ ।
सोमबारको प्रिमियर लिग खेलमा औबामेयाङले एक महिने गोल खडेरी तोडपछि आर्सनलले न्युकासललाई ३–० ले हरायो । जितपछि आर्सनल २७ अंक सहित १० औं स्थानमा उक्लिएको छ । खराब शुरुवात गर्दै एक समय रेलिगेसन जोनभन्दा केही माथि मात्रै रहेको आर्सनलले पछिल्लो पाँच लिग खेलमध्ये चारमा जित हात पारेको छ ।
डिसेम्बर १६ यता गोल नगरेका औबामेयाङले सोमबार ५० औं मिनेटमा आर्सनललाई अग्रता दिलाए भने बुकायो साकाले ११ मिनेटपछि टिमलाई दुई गोलको अग्रता दिलाए । औबामेयाङले ७७ औं मिनेटमा टिमको तेश्रो र आफ्नो व्यक्तिगत दोश्रो गोल गरेका थिए ।
“हामी एक टोलीको रुपमा एक ढिक्का हुदै गइरहेका छौं । हामीले मैदानबाहिर केही छलफलहरु गर्दै आइरहेका थियौं । पुरै टिम अहिले बलियो बनेको छ र त्यो मैदानमा देखिन थालेको छ,” आर्सनल मिडफिल्डर एमिली स्मिथले भने ।
न्युकासल सात अंकले मात्र रेलिगेसन जोन बाहिर १५ औं स्थानमा रहेको छ । पहिलो हाफमा पर्याप्त मौकाहरु चुकाएका औबामेयाङले सोमबार पनि आफ्नो खराब लयलाई कायमै राख्ने झल्को दिएका थिए । तर दुई गोल गर्दै उनले यो सिजन पाँच गोल गर्न सफल भएका छन् ।
