प्रशिक्षक मउरिसियो पोचेटिनो कोरोना भाइरस संक्रमण भएपछि उपस्थित हुन नसकेको खेलमा पेरिस सेन्ट जर्माइन एंगर्सलाई १–० ले हराउदै लिग वानको शिर्ष स्थानमा उक्लिएको छ ।
लेभिन कुर्जावाले गरेको एक मात्र निर्णायक गोलले पिएसजीलाई लियोनमाथि दुई अंकको अग्रता दिलाएको थियो । सामेबार हुने खेलमा मेट्जलाई हराउने हो भने लियोन पुन शिर्ष स्थानमा उक्लन सक्नेछ ।
शुक्रबार भारस संक्रमण भएको पुष्टि भएपछि पोचेटिनो सेल्फ आइसोलेसनमा गएपछि सहायकद्वय जिजस पेरेज र मिग्वेल डिएगोस्टिनोले बेञ्चको कमान सम्हालेका थिए । पिएसजीले पोचेटिनो बाहेक अन्य तीन खेलाडी ब्राजिलियन रफिन्हा, जर्मनीका थिलो केह्रर र फ्रेञ्च अण्डर २१ खेलाडी कोलिन डाग्बालाई पनि गत हप्ता कोरोनाकै कारण गुमाइसकेको छ ।
किलियन एमबाप्पे र एन्जल डि मारियालाई अग्रपक्तिमा शुरु गराउदा बलियो देखिएको पिएसजी एंगर्सबिरुद्ध सशक्त देखिन भने सकेन । खेलमा एंगर्सले केही आकर्षक मुभहरु बनाउदै पिएसजीमाथि दवाब राख्न सफल भएको थियो ।
कुर्जावाले भलि मार्फत गोल गरेपछि पिएसजीलाई राहत मिलेको थियो । कुर्जावाले झण्डै एक बर्षमा पहिलो पटक पिएसजीका लागि गोल गरेका हुन् । पोचेटिानो दुई हप्ता अघि प्रशिक्षक नियुक्त भएयता पिएसजीले चारमध्ये तीन खेलमा जित हात पारेको छ । अर्को एक बराबरीमा टुंगिएको थियो ।
पिएसजीले गत हप्ता नै च्याम्पियन्स ट्रफिमा मार्सेलाई हराएपछि पोचेटिनो प्रशिक्षण करिअरकै पहिलो उपाधि जितेका थिए ।
