अखिल नेपाल फुटबल संघ एन्फाको आयोजनामा राष्ट्रिय महिला लिग फुटबल प्रतियोगिता बुधबारदेखि सुरु हुने भएको छ।
प्रतियोगितामा तीन विभागीय टोली सेना, सशस्त्र प्रहरी र नेपाल प्रहरीसँगै चौदण्डीगढी नगरपालिका, विराटनगर महानगरपालिका, वालिङ नगरपालिका र चन्द्रपुर नगरपालिकाको सहभागिता रहनेछ।
विजेताले १५ लाख प्राप्त गर्नेछ। यस्तै दोस्रो, तेस्रो र चौथो हुने टिमले क्रमश आठ लाख, पाँच लाख र तीन लाख प्राप्त गर्नेछन।
लिगको उत्कृष्ट खेलाडीलाई स्कुटर प्रदान गरिनेछ भने बेस्ट गोलकिपर, डिफेन्स, मिडफिल्डर, फर्वाड र प्रशिक्षकलाई ५०-५० हजार प्रदान गरिनेछ। फेयर प्ले टिमले पनि एक लाख पचास हजार प्राप्त गर्नेछन ।
यो नगद पुरस्कार महिला फुटबलको अहिलेसम्म कै सर्वाधिक रकमको नगद पुरस्कार पनि हो। सातै टिमलाई तयारी खर्च एक एक लाख र कोभिड कोष ५० हजार एन्फाले उपलब्ध गराउनेछ।
प्रत्येक टिममा २३ खेलाडी र सात अफिसियल गरी ३० जना रहनुपर्नेछ भने एक टिमले चार विदेशी खेलाडी राख्न पाउने नियम बनाइएको छ। उदघाटन र फाइनल खेल दशरथ रङ्गशालामा हुनेछ भने बाकी खेल सातदोबाटोमा हुनेछ।
