दोश्रो श्रेणीको टोली होल्स्टेन किएलसँग पेनाल्टी सुटआउटमा स्तब्ध भएपनि बायर्न म्युनिख दुई दशकमा पहिलो पटक जर्मन कपको दोश्रो चरणबाटै बाहिरिएको छ ।
दुई पटक अग्रता लिएपनि उत्कृष्ट पुनरागमन गर्दै खेललाई २–२ को बराबरीमा टुँगाउदै किएलले एक्ट्रा टाइमपछि पेनाल्टी सुटआउटमा ६–५ को सनसनीपूर्ण जित रचेको थियो । “यो जितलाई हामी बर्षौसम्म सम्झिरहनेछौं,” किएलका ३२ बर्षिय प्रशिक्षक ओले वेर्नरले भने ।
किर्तिमानी २० पटक जर्मन कप जितेको बायर्न २००४ यता पहिलो पटक प्रतियोगितामा दोश्रो श्रेणीको टोलीसँग पराजित भएको हो । २०२० मा एक मात्र खेल हार्दै च्याम्पियन्स लिग, बुन्डेसलिगा र पोकल कप जितेको बायर्नले २०२१ को शुरुवातमा तीनमा दुई खेल हारेको छ ।
गत शुक्रबार पनि बायर्नले बुन्डेसलिगमा बोरुसिया मोएन्चेनग्लाडबाचसँग पराजय ब्यहोरेको थियो । लिगमा बायर्नको त्यो दोश्रो हार थियो ।
बायर्नका मार्क रोकाको पेनाल्टीलाई किएल गोलकिपर इयोनिस जेलियोसले बचाएपछि बार्टेसले निर्णयक गोल गर्दै किएलको जित सुनिश्चित पारेका थिए । रोका पेनाल्टीमा चुक्ने एक मात्र खेलाडी थिए ।
१४ औं मिनेटमा थोमस मुलरको हेडर जेलियोसको हातमा लागेर आएपछि सर्जि नाब्रीले बायर्नलाई अग्रता दिलाएका थिए । बायर्नले दवाब कायम गरिरहदा बार्टेल्सले ३७ औं मिनेटमा किएलका लागि बराबरी गोल गरेका थिए ।
तर ४८ औं मिनेटमा लिरोय सानेले एक पटक फेरि बायर्नको अग्रता फर्काएका थिए । त्यसपछि भने किएलले निकै संगठित डिफेन्डिङ्ग गर्दा बायर्न हतोत्साहित हुन पुगेको थियो । इन्जुरी समयमा हउके वाह्लले बराबरी गोल गर्दै खेललाई एक्स्ट्रा टाइममा धकेलेका थिए जहाँ घरेलु टोली बायर्नलाई रोक्न सफल भएको थियो ।
