ब्राजिलियन स्टार नेमार आफ्नो पुनरागमन खेलमै गोल गर्न सफल हुँदा माउरिसियो पोचेटिनोले पेरिस सेन्ट जर्माइनका लागि प्रशिक्षकको रुपमा पहिलो उपाधि जितेका छन् ।
लेन्समा बिहिबार भएको फ्रेन्च च्याम्पियन्स ट्रफीको फाइनलमा पिएसजीले चीर प्रतिद्वन्दी मार्सेलाई २–१ ले पराजित गर्यो । माउरो इकार्डीले पहिलो हाफमा गोल गरेपनि नेमारले पिएसजीलाई ८५ औं मिनेटमा पेनाल्टीमार्फत गोल गर्दै पिएसजीको जित सुनिश्चित गरेका थिए ।
पोचेटिनोले पिएसजीको प्रशिक्षकमात्रै नभएर व्यवस्थापन करिअरकै पहिलो उपाधि जितेका हुन् । “म अझै धेरै उपाधि जित्न चाहन्छु तर पहिलो जहिल्यै पनि बिशेष हुनेछ । राम्रो खेलेको कारण हामी उपाधिको हकदार पनि थियौं,” पोचेटिनोले खेलपछि भने ।
सुपर कप समान रहेको च्याम्पियन्स ट्रफि सामान्यतया सिजनको शुरुवातमा लिग च्याम्पियन र फ्रेन्च कपको बिजेताबीच हुने गरेको छ । यो सिजन कोरोना भाइरसको अघिल्लो सिजन स्थगनका कारण केही पर धकेलिएको थियो ।
गत सिजन दुवै उपाधि पिएसजीले जित्दा मार्सेलाई लिग वान उपबिजेताको हैसियतले स्थान दिइएको थियो । गत सेप्टेम्बरमा भएको निकै तनावपूर्ण खेलमा दुई टिमका नेमारसहित पाँच खेलाडीले रेड कार्ड खादा लेन्समा भिडन्त रोचक हुने अपेक्षा गरिएको थियो ।
तर निरस रहेको खेलको प्रमुख आकर्षण नै नेमारले सब्स्टिच्युटको रुपमा प्रवेश गर्दै एक महिनापछिको पुनरागमनमा गरेको गोल हुन पुग्यो । डिसेम्बर १३ मा लियोनसँग १–० ले पराजित भएको खेलमा गोलीगाँठोमा चोट लागेपछि नेमार मैदानबाहिर रहेका थिए ।
दिमीत्री पायेटले मार्सेका लागि एक मात्र गोल फर्काएका थिए । तर एक मिनेट मात्र बाकी रहदा पायेटको गोल निकै ढिलो आइपुगेको थियो ।