मेलबर्न विरुद्ध सन्दिपको सामान्य प्रदर्शन

बिग ब्यास लिग अन्तर्गत मेलबर्न स्टार्स विरुद्धको खेलमा नेपाली टोलीका लेग स्पिनर सन्दिप लामिछानेले सामान्य प्रदर्शन गरेका छन् । खेलमा ब्याट फ्लिप जितेर पहिले बलिङ रोजेको होबार्ट हरिकेन्सको तर्फबाट सन्दिपले चार ओभर बलिङ गर्दै ३६ रन खर्चिएर एक विकेट मात्र हात पार्न सफल रहे ।

आफ्नो पहिलो दुई ओभरमा मात्र पाँच रन खर्चिएर एक विकेट हात पारेका सन्दिपले त्यस पछिका दुई ओभरमा ३१ रन खर्चन पुगे ।

आफ्नो पहिलो ओभरमा तीन सिंगल खर्चिएका सन्दिपले दोश्रो ओभरमा अझै उत्कृस्ट बलिङ गर्दै मात्र दुई रन खर्चिए भने एक विकेट पनि हात पार्न सफल भए । उनले आफ्नो दोश्रो ओभरकको दोश्रो बलमा छ रन बनाएका मेलबर्नका कप्तान ग्लेन म्याक्सवेललाई एलबीडब्लुको धरापमा पारे ।

आफ्नो तेश्रो ओभरमा सन्दिपले महँगो साबित हुँदै एक छक्का सहित १२ रन खर्चिए भने चौथों तथा अन्तिम ओभरमा दुई छक्का र एक चौका सहित १९ रन खर्चिए ।

यस अघि जारी सिजनको आफ्नो पहिलो खेलमा सन्दिपले राम्रो सुरुवात गरेका थिए । महँगो साबित भए पनि सन्दिपले दुई विकेट हात पार्दै आफ्नो टोलीको जितमा महत्वपूर्ण भूमिका खेलेका थिए । उनले चार ओभर बलिङ गर्दै ३८ रन खर्चिएर दुई विकेट हात पारेका हुन् । सन्दिपले आफ्नो पहिलो र अन्तिम ओभरमा विकेट लिएका थिए ।

आफ्नो पहिलो ओभरमा दुई चौका सहित ११ रन खर्चिएका सन्दिपले एक विकेट पनि हात पारे । उनले आफ्नो पहिलो ओभरको चौथों बलमा हिल्टन कार्टराइटलाई बोल्ड गर्दै आफ्नो यस सिजनको आफ्नो पहिलो विकेट लिएका हुन् ।