बिग ब्यास लिगमा सन्दिपको उत्कृस्ट सुरुवात 

नेपाली टोलीका लेग स्पिनर सन्दिप लामिछाने यस सिजनको बिग ब्यास लिगमा उत्कृस्ट सुरुवात  गरेका छन् । आजको खेलमा होबार्ट हरिकेन्सको तर्फबाट पहिलो खेल खेलेका सन्दिपले चार ओभर बलिङ गर्दै ३८ रन खर्चिएर दुई विकेट हात पारेका छन् ।

सन्दिपले आफ्नो पहिलो र अन्तिम ओभरमा विकेट लिएका हुन् । आफ्नो पहिलो ओभरमा दुई चौका सहित ११ रन खर्चिएका सन्दिपले एक विकेट पनि हात पारे । उनले आफ्नो पहिलो ओभरको चौथों बलमा हिल्टन कार्टराइटलाई बोल्ड गर्दै आफ्नो यस सिजनको आफ्नो पहिलो विकेट लिएका हुन् ।

सन्दिपले आजको खेलमा होबार्टको लागि डेब्यु गरेका हुन् । यहि मङ्सिरको दोश्रो साता अष्ट्रेलिया पुगेका सन्दिप अष्ट्रेलियन सरकारको नियम अनुसार १४ दिनको अनिवार्य क्वारेन्टाइनमा बिताए पछि खेल्नका लागि उपलब्ध भएका हुन् ।

यस अघि खेलमा ब्याट फ्लिप हारेर पहिले ब्याटिङ गरेको होबार्टले डाविड मलनको आक्रमक अर्धशतकको मद्धतमा पुरै २० ओभर खेल्दै पाँच विकेटको नोक्सानीमा १६४ रन बनायो ।

तेश्रो नम्बरमा ब्याटिङ गर्न आएका मलनले ५६ बल खेल्दै सात चौका र तीन छक्काको मद्धतमा ७५ रन बनाए । मलन बाहेक ओपनर बेन म्याकडेर्मोटले ३१ तथा कोलिन इन्ग्रामले २६ रनको पारी खेले ।

मेलबर्नका बिल्ली स्ट्यानलेकले चार ओभर बलिङ गर्दै सर्वाधिक तीन तथा ग्लेन म्याक्सवेलले र साम रेनबर्डले पनि समान १-१ विकेट हात पारे ।

बिग ब्यासको गत दुई सिजन मेलबर्न स्टार्सबाट खेलेका सन्दिपलाई यस सिजन भने मेलबर्नले यस आबद्ध गरेन । जसका कारण होबार्टले उनलाई आफ्नो टोलीमा समावेस गरेको थियो ।उनले दुई सिजनमा मेलबर्नको तर्फबाट २१ खेल खेल्दै १९ दशमलब ८० को औषतमा २६ विकेट आफ्नो नाममा दर्ता गराएका थिए । सन् २०१८ मा पहिलो पटक बिग ब्यास खेलेका सन्दिपले आठ खेलमा ११ विकेट हात पारेका थिए भने सन् २०१९ को सिजनमा १३ खेल खेल्दै १५ विकेट लिएका थिए ।

होबार्ट १५ अंक सहित अंक तालिकाको तेश्रो स्थानमा छ भने मेलबर्न १० अंक सहित पाँचौं स्थानमा रहेको छ । छ खेल खेलेको हुबार्टले चार खेलमा जित निकाल्दा दुई खेलमा पराजित भएको छ भने एक खेल कम खेलेको मेलबर्नले समान २-२ खेलमा जित र हार व्यहोरेको छ भने एक खेल नतिजा विहिन रहेको थियो ।