इङ्गलिस प्रिमियर लिगमा आफ्नो टोली न्युकासलसँग गोलरहित बराबरीमा रोक्किएपछि लिभरपुल व्यवस्थापक योर्गेन क्लोपले अंक तालिकालाई आफूले धेरै नसोचेको बताएका छन् ।
लिभरपुलको बराबरीले यो सिजन उपाधि होड निकै प्रतिस्पर्धात्मक हुने तय जस्तै देखिदा अन्य टोलीहरुलाई पनि फाइदा पुगेको छ । यद्दपि २०२० को अन्त्य हुदा लिभरपुल अंक तालिकाको शिर्ष स्थानमै रहने भएको छ ।
अंक तालिकाको अन्तिम हाफमा रहेका टोलीहरुसँग लगातार दुई बराबरी खेल्दा लिभरपुलले दोश्रो स्थानको म्याचेस्टर युनाइटेडसँग मात्र तीन अंकको अग्रता बनाएको छ । तर ओले गुनार सोल्सायरको युनाइटेडले एक खेल कम खेल खेलेको छ । लिभरपुलको १६ खेलबा ३३ अंक छ ।
सेन्ट जेम्स पार्कमा भएको अवे खेलमा लिभरपुलले गोल गर्ने तीन स्पष्ट मौका चुकाएको थियो । त्यसमध्ये दुई अवसर मोहम्मद सलाहले खेर फालेका थिए भने सादियो मानेको प्रहारलाई फाबियन सारले गोललाईनबाटै क्लियर गरिदिएका थिए ।
“शिर्ष स्थानमा रहनु राम्रो हो तर यसले केही मतलब राख्दैन । हामीले आज बराबरी गर्यौ र पनि शिर्ष स्थानमै छौं । यसले यो सिजन सबैका लागि कति कठिन हुनेछ भनेर स्पष्ट भएको देखाउछ,” क्लोपले खेलपछि भने ।
“हामीले चाहे जस्तो परिणाम पाएनौं र यो हाम्रो लागि खराब कुरा होइन । संसारमा खराब कुरा धेरै भइरहेका छन्,” कोरोना भाइरसको नयाँ संक्रमणतर्फ संकेत गर्दै उनले भने । “मलाई तर आजको खेल राम्रो लाग्यो । हामी परिणाम देखि खुशी छैनौं तर प्रदर्शन सन्तोषजनक नै थियो ।”
सन् १९८४ यता लगातार दुई प्रिमियर लिग उपाधिका लागि लिभरपुल दावेदार नै रहेको छ तर उसको अवे खेलको प्रदर्शन भने अभिशाप नै बनेको छ । आठ होम खेलमा लिभरपुलले सातमा जित हात पारेको छ तर उति नै अवे खेलमा मात्र दुई जितेको छ । लिभरपुलको घाइते खेलाडीहरुको सुची पनि लामै रहेको छ र त्यसमा अब जोल माटिप पनि थपिएको क्लोपले खुलाशा गरेका छन् ।
क्लोपका अनुसार माँसपेशी तन्किदा माटिप तीन साता मैदान बाहिर रहनेछन् । लिभरपुलले यसअघि नै प्रमुख एट्याकिङ्ग डिफेन्डर भर्जिल भान डाइकलाई एक बर्षका लागि गुमाइसकेको थियो भने अन्य खेलाडीहरु पनि चोटग्रस्त रहदै आएका छन् ।
यस्तोमा अंक तालिकामा अन्य क्लबहरुले फाइदा उठाउन सक्ने देखिन्छ । अघिल्लो सिजनको तुलनामा यो सिजन प्रिमियर लिगमा कुनै पनि टोलीको बिशाल अग्रता देखिएको छैन । तेश्रोमा रहेको लेस्टर र चौथो स्थानको एभर्टनको समान २९ अंक छ भने एस्टन भिल्ला, चेल्सी, टोटेन्ह्याम हट्स्पर, म्यानचेस्टर सिटी र साउथ्याम्प्टनको समान २६ अंक छ ।