भारत र अष्ट्रेलिया बीचको दोश्रो टेस्ट भोलीबाट, गिल र सिराजले डेब्यु गर्दै 

पहिलो टेस्टको पहिलो पारीमा भारतले २४४ रन मात्र बनाउन सके पनि अष्ट्रेलियालाई १९१ रनमा रोक्दै ४३ रनको अग्रता लिन सफल भयो । तर भारतलाई उसको दोश्रो पारीमा मात्र ३६ रनमा अलआउट गरेको अष्ट्रेलियाले तेश्रो दिनमा नै ९० रनको लक्ष्य दुई विकेट गुमाएर पार गर्यो ।

दोश्रो टेस्टमा भारतीय कप्तान विराट कोहलीको अनुपस्थितिमा अजिंक्य रहानेले टोलीको नेतृत्व गर्नेछन् । कोहली पिता बन्न लागेकाले गर्दा पहिलो टेस्ट पछि भारत फर्किएका छन् ।

भारतले दोश्रो टेस्टको लागि आफ्नो सुरुवाती ११ पनि घोषणा गरिसकेको छ । भारतका ओपनर शुबमन गिल र मोहम्मद सिराजले टेस्टमा डेब्यु गर्ने भएका छन् । सिराजले पहिलो टेस्टमा घाइते भएका मोहम्मद शामी तथा गिलले पृथ्वी शको स्थानमा सुरुवाती ११ मा स्थान बनाएका हुन् । त्यस्तै विकेट किपर रिशब पन्तले रिद्दिमन शाह र रविन्द्र जदेजाले कोहलीको स्थानमा खेल्ने भएका छन् ।

अचम्म लाग्दो विषय के छ भने भारतले कोहलीको अनुपस्थितिमा पनि दोश्रो टेस्टमा केएल राहुललाई खेलाएको छैन । पहिलो टेस्टमा पनि मौका नपाएका राहुल हालै युएईमा सम्पन्न इन्डियन प्रिमियर लिगमा तथा अष्ट्रेलिया विरुद्धको नै ट्वान्टी ट्वान्टी र एकदिवसीय शृंखलामा राम्रो प्रदर्शन गरेका थिए ।

भारतले यस अघि सन् २०१८ मा अष्ट्रेलिया भ्रमणमा एतिहासिक टेस्ट शृंखला माथि कब्जा जमाएको थियो । भारतले पहिलो पटक अष्ट्रेलिया माथि उसकै घरेलु मैदानमा पहिलो पटक टेस्ट शृंखला जितेको थियो । भारतले चार टेस्टको शृंखला २-१ ले आफ्नो पोल्टामा पार्न सफल भएको थियो ।