लियोनल मेस्सीले एकै क्लबका लागि सबैभन्दा धेरै गोल गर्ने किर्तिमान तोडेको दिन बार्सिलोनाले स्पेनिस ला लिगामा रियल भालाडोलिडमाथि ३–० को शान्दार जित रचेको छ ।
अवे खेलमा टोलीका लागि ६५ औं मिनेटमा तेश्रो गोल गर्दै मेस्सीले पेलेले ब्राजिलियन क्लब सान्तोसका लागि गरेको ६ सय ४३ गोलको किर्तिमान तोडेका हन् । २१ औं मिनेटमा क्लेमेन लेँगलेटको गोल मार्फत अग्रता लिएको बार्सिलोनाका लागि मार्टिन ब्रेथवेटले ३५ औं मिनेटमा दोश्रो गोल गरेका थिए ।
पछिल्लो चार खेलमा तीनमा जित हात पारेको बार्सिलोना ला लिगाको अंक तालिकामा १४ खेलबाट २४ अंकका साथ पाचौं स्थानमा कायमै रहेको छ । शिर्ष स्थानमा एट्लेटिको म्याड्रिडले रियल सोसिडाडलाई २–० ले हराउदै तीन अंकको अग्रता बनायो ।
दोश्रो स्थानमा रहेको रियल म्याड्रिडको २९ अंक छ भने उसले एक खेल बढी खेलेको छ । अंक तालिकामा केही समय शिर्ष स्थानमा रहेको सोसिडाड भने २६ अंक साथ तेश्रो स्थानमा रहेको छ । सोसिडाडले १६ खेल खेलिसकेको छ । चौथो स्थानको भिलारियालको पनि समान २६ अंक छ ।
एट्लेटिकाको जितमा मारियो हर्मोसो र मार्कोस लोरेन्टेले गोल गरेका थिए । सोमबार नै भएका अन्य खेलमा हवेस्काले लेभान्टेसँग र एथ्लेटिक बिल्बाओले भिलारियालसँग समान १–१ गोलको बराबरी खेलेको थियो ।
