स्कट म्याकटोमिने प्रिमियर लिग इतिहासको पहिलो तीन मिनेटमै दुई गोल गर्ने पहिलो खेलाडी बन्दा म्यानचेस्टर युनाइटेड खराब शुरुवातलाई पछाडी छोड्दै अंक तालिकाको तेश्रो स्थानमा उक्लिएको छ ।
आइतबार ओल्ड ट्राफोर्डमा भएको खेलमा युनाइटेडले म्याकटोमिने र ब्रुनो फर्नान्डेसको दुई–दुई गोलसँगै ड्यानियल जेम्स र भिक्टर लिन्डेलफको गोलमा लिड्स युनाइटेडलाई ६–२ को फराकिलो अन्तरले पराजित गर्यो ।
६७ औं सेकेण्डमै म्याकटोमिनेले सशक्त प्रहार गर्दै युनाइटेडलाई अग्रता दिलाए र त्यसको केही सेकेण्डमै एन्थोनी मार्सियलको पासमा दोश्रो गोल गरे । फर्नान्डेस र लिन्डेलफले गोल गरेपछि युनाइटेड ३७ मिनेटमै ४–० ले अघि बढेको थियो । लियम कुमरले हेडरमार्फत लिड्सको पहिलो गोल गरेपछि पहिलो हाफ अघि नै खेलमा पाँच गोल भएको थियो ।
जेम्सले ६६ औं मिनेटमा युनाइटेडको पाचौं गोल गरे भने फर्नान्डेसले चार मिनेटपछि पेनाल्टीमार्फत अर्को गोल थपेका थिए । स्टुवर्ट डालासले ७३ औं मिनेटमा लिड्सका लागि सान्त्वना गोल गरे । युनाइटेडको एभर्टनसँगै २६ अंक रहेको छ तर उ गोल अन्तरको आधारमा तेश्रो स्थानमा रहेको छ । लिभरपुल ३१ अंकसाथ शिर्ष स्थानमा रहेको छ ।
आइतबार नै भएको खेलमा लेस्टर सिटी टोटेन्ह्याम हट्स्परलाई २–० ले हराउदै दोश्रो स्थानमा उक्लन सफल भयो । लेस्टरको जितमा जेमी भाडीले पेनाल्टीमार्फत गोल गरेका थिए भने टोबी एल्डरवेरेल्डले आत्मघाती गोल गरेका थिए ।
लेस्टरको २७ अंक छ भने युनाइटेडको जितपछि टोटेन्ह्याम पाचौं स्थानमा झरेको छ । अर्को खेलमा एस्टन भिल्लाले वेस्ट ब्रोमिविच आल्बियनमाथि ३–० को सहज जित हात पार्यो । ब्राइटनसँग १–१ को बराबरी खेल्दै सेफिल्ड युनाइटेडले सिजनको दोश्रो अंक बटुल्यो ।
