करिम बेन्जेमाले आफ्नो उच्च लयलाई कायम राखेपछि रियल म्याड्रिड स्पेनिस ला लिगामा लगातार चौथो जित रच्दै अंक तालिकामा शिर्ष स्थानको होडबाजीमा कायमै रहेको छ ।
बेन्जेमाले एक गोल गर्नुका साथै अर्कोमा असिस्ट गरेपछि रियलले आइतबार आइबारलाई ३–१ ले पराजित गर्यो । रियल एट्लेटिको म्याड्रिडसँगै समान २९ अंकमा रहेपनि गोल अन्तरका आधारमा दोश्रो स्थानमा रहेको छ । एट्लेटिकोले दुई खेल कम खेलेको छ ।
तीन खेल बढी खेलकेको रियल सोसिडाड २६ अंक सहित तेश्रो स्थानमा रहेको छ भिलारियाल (२५) चौथो र २१ अंक रहेको बार्सिलोना पाचौं स्थानमा रहेको छ ।
छैटौं मिनेटमा बेन्जेमाले सिजनको सातौं गोल गरेपछि रियलले अग्रता लिएको थियो । त्यसपछि उनले १३ आंै मिनेटमा लुका मोड्रिचको लागि गोलको अवसर बनाएका थिए । हाफ टाइम अघि कप्तान किके गार्सियाले पेनाल्टी बक्स बाहिरबाट उत्कृष्ट गोल गर्दै आइबारलाई खेलमा फर्काएका थिए ।
तर लुकास भास्केजले अतिरिक्त समयमा गोल गर्दै रियलको तीन अंक सुनिश्चित पारे । आइतबार नै भएका अन्य खेलमा सेल्टा भिगोले आलाभेसलाइ, ग्रानडाले रियल बेटिसलाई र गेटाफेले काडिजलाई समान २–० गोल अन्तरले पराजित गरेका थिए ।