मार्कस रासफोर्डले दुई गोल गरेपछि इङ्गलिस प्रिमियर लिगको सनसनीपूर्ण खेलमा म्यानचेस्टर युनाइटेडले सेफिल्ड युनाइटेडमाथि ३–२ को सनसनीपूर्ण जित हात पारेको छ ।
पराजयपछि १३ खेलबाट मात्र एक अंक बटुलेको सेफिल्ड प्रिमियर लिग इतिहास १८८८ देखि शुरु भए यताकै खराब शुरुवात गर्ने क्लब पनि बनेको छ । तर युनाइटेडले भने लगातार ६ अवे खेल जित्न भने सफल भएको छ ।
युनाइटेड २३ अंकसहित १२ खेलपछि अंक तालिकाको छैटौं स्थानमा उक्लिएको छ भने शिर्ष स्थानको लिभरपुलभन्दा मात्र पाँच अंकले पछि रहेको छ । रोजक के छ भने यो सिजनको शुरुवातदेखि नै खराब प्रदर्शनले आलोचित बन्नुका साथै च्याम्पियन्स लिगमा पनि समुह चरणबाटै बाहिरिएको युनाइटेडले एक खेल कम खेलेको छ ।
शिर्ष स्थानका क्लबहरुले दुई खेलमा अंक गुमाउने र आफू दुवै खेल जित्ने हो भने युनाइटेड शिर्ष स्थानमा समेत उक्लन सक्छ ।
बिहिबारको अवे खेलमा युनाइटेड पाचौं मिनेटमै पछि परेको थियो । सेफिल्डका लागि डेभिड म्याकगोल्ड्रिकले पहिलो गोल गरेका थिए । रासफोर्ड र एन्थोनी मार्सियलले सात मिनेटको अन्तरालमा दुई गोल गरेपछि युनाइटेडले पहिलो हाफको समाप्तिमा २–१ को अग्रता पाएको थियो ।
मार्सियलले ४ सय ९१ मिनेटको खडेरी तोड्दै पहिलो गोल गर्दा उनलाई पउल पोग्बाले असिस्ट गरेका थिए । दोश्रो हाफ शुरु भएको ६ मिनेटमै रासफोर्डले गोल गर्दै युनाइटेडको अग्रतालाई दोब्बर पारेका थिए । तर युनाइटेड खेलको अन्त्यमा पूर्ण रुपमा दवाबमा आयो ।
म्याक्गोल्ड्रिकले ८७ औं मिनेटमा कर्नरबाट गोल गर्दै युनाइटेडलाई दवाबमा राखेपनि त्यसपछि लगातार आक्रमण बुन्दा लिस मुसेटको उत्कृष्ट प्रहारलाई युनाइटेड गोलकिपर डिन हेन्डरसनले मुस्किलले बचाएका थिए ।
