डिफेन्डिङ्ग च्याम्पियन बायर्न म्युनिख लोकोमोटिभ मस्कोलाई समुह चरणको अन्तिम खेलमा लोकोमोटिभ मस्कोलाई २–० ले हराउदै च्याम्पियन्स लिगमा लगातार १७ खेल अपराजित रहेको छ ।
गत सिजन उपाधि जित्ने क्रममा लगातार ११ खेल जितेको बायर्नले यो सिजनको मात्र एक समुह चरणको खेलमा बराबरी गरेको छ । समुह ए मा बायर्न १६ अंक सहित अन्तिम १६ मा प्रवेश गरेको हो भने एट्लेटिको म्याड्रिड उपबिजेताको रुपमा ९ अंक सहित अर्को चरण पुगेको हो ।
एलायन्ज एरिनामा भएको खेलमा निक्लास सुलेको सशक्त हेडरमा बायर्नले अग्रता लिएको थियो भने एरिक म्याक्सिम चुपो–मोटिङले जित सुनिश्चित पारेका थिए । दुवै गोल खेलको दोश्रो हाफमा भएको थियो । बायर्न यसअघि नै समुह चरणको बिजेताको रुपमा प्रि–क्वार्टरफाइनल प्रवेश गर्ने तय भइसकेको थियो ।
अर्को महत्वपूर्ण खेलमा एट्लेटिकोले आरबी साल्जबर्गलाई २–० ले हराएको हो । साल्जबर्गले जितेको खण्डमा उ नै अन्तिम १६ मा प्रवेश गर्ने थियो । ह्यान्सि फ्लिकको टोली स्ट्राइकर रोबर्ट लेवान्डोस्कीबिना मैदान उत्रिएको थियो र अझै ठूलो अन्तरले खेल जित्न सक्ने थियो ।
बायर्नले च्याम्पियन्स लिगमा सबैभन्दा बढी लगातर खेल जित्ने इतिहास आफ्नो नाममा लेखाइसकेको छ भने अब उसको आखा म्यानचेस्ट युनाइटेडको सबैभन्दा लामो अपराजित यात्राको किर्तिमानमा रहेको छ । तर यसको लागि बायर्न अर्को सिजनसम्म नै अपराजित रहनु पर्नेछ ।
म्यानचेस्टर युनाइटेडको नाममा च्याम्पियन्स लिग इतिहासमा एलेक्स फर्गुसन व्यवस्थापक रहदा २००७ देखि २००९ सम्मको सिजनमा लगातार २५ खेल अपराजित रहेको किर्तिमान रहेको छ । दोश्रो स्थानमा संयुक्त रुपमा डच टोली बायर्न र आयाक्स रहेका छन् ।
आयाक्स १९९४ देखि १९९६ सम्मको सिजनमा र बायर्न २००१ देखि २००२ सम्मको सिजनमा १९ खेल अपराजित रहेका थिए । बार्सिलोना र युनाइटेडकै १६ खेलको अर्को अपराजित किर्तिमान रहेको छ ।
