१३ पटकको किर्तिमानी च्याम्पियन्स लिग बिजेता रियल म्याड्रिडलाई यो सिजन समुह चरणबाट अन्तिम १६ सम्म पुग्न अन्तिम खेल कुर्नु पर्छ भनेर कसैले सोचेको थिएन । अघिल्लो सिजन स्पेनिस लिग ला लिगाको बिजेता रियल म्याड्रिड यो सिजन च्याम्पियन्स लिगमा शख्तर दोनेस्कसँग दुवै खेलमा पराजित होला भनेर पनि कसैले सोचेको थिएन ।
च्याम्पियन्स लिगको शुरुवातमै शख्तारसँग ३-२ ले पराजित रियल दोस्रो खेलमा बोरुसिया मोचेनग्याल्डब्याचसँग २-२ को बराबरीमा रोकिएको थियो तर इन्टर मिलानसँग भने होम-अवे दुवैमा जित हात पारेपछि केही राहतको स्वास फेर्यो ।
आज हुने मोचेनग्याल्डब्याच विरुद्धको होम खेलमा रियलले जित निकाल्न नसक्ने हो भने रियल युरोपा लिग खेल्न वाध्य हुने छ वा च्याम्पियन्स लिगबाटै बहिरिने सम्भावना पनि बढ्नेछ । मोचेनग्याल्डब्याच विरुद्ध हुने होम खेलमा रियलको टोलीमा कप्तान सर्जियो रामोस फर्किएका छन् । रियलका लागि एडेन हजार्डले चोटका कारण यो खेल गुमाउने छन् । मोचेनग्याल्डब्याच भने खेलमा हार टारे पनि अर्को चरण पुग्ने छ ।
खेल नेपाली समय अनुसार १:४५ मा सुरु हुने छ ।
यस्तै यही समुह बि अन्तर्गत आजै हुने अर्को खेलमा इन्टर मिलान र शख्तर खेल्दै छन् । इन्टर अर्को चरणमा पुग्न निकै कठिन रहेको छ । इन्टरका लागि रोमेलु लुकाकु टोलीमा फर्किएका छन् । इन्टरका लागि अन्तिम १६ पुग्ने बाटो गणीतीय आधारमा खुल्ला रहे पनि खेलमा पराजित भए वा बराबरीमा रोकिए इन्टर च्याम्पियन्स लिगबाटै बहिरिने छ ।
यस्तै आजै हुने अन्य खेलहरुमा मिजिल्याण्ड विरुद्ध लिभरपुल र हिजो रोकिएको पिएसजी विरुद्ध इस्तानाबुल बसिकशेहर बिचको खेल पनि नेपाली समय अनुसार ११:४५ मा हुने छन् । यस्तै १:४५ बजे हुने खेलहरुमा आयाक्स र एटलान्टा,बायर्न र लोकोमोटिभ मोस्को, रेड बुल साल्जबर्ग र एट्लेटिको म्याड्रिड भिड्ने छन् ।
