फुटबल लेजेण्ड डिएगो म्याराडोनाको मृत्यु भएको दुई हप्ता पछि नै अर्जेन्टिनाले २०१४ को बिश्वकप फाइनल डोर्याउने प्रशिक्षक आलेहान्द्रो साबेलालाई गुमाएको छ ।
स्वास्थ्यमा समस्या देखिएपछि ६६ बर्षिय साबेला गत नोभेम्बरदेखि नै अस्पतालमा भर्ना भएका थिए । साबेलाले आफ्नो क्लब करिअरमा इङ्गलिस प्रिमियर लिग टोली लिड्स र सेफिल्ड युनाइटेडका लागि पनि खेलेका थिए ।
अर्जेन्टिनाका लागि ८ खेल खलेका साबेलाले राष्ट्रिय टोलीलाई तीन बर्ष प्रशिक्षण दिएका थिए । सन् २०११ देखि अर्जेन्टिनाको प्रशिक्षण सम्हालेका साबेलाको यात्रा २०१४ को बिश्वकप फाइनलमा जर्मनीसँग १–० ले पराजित भएपछि समाप्त भएको थियो ।
उनले सेफिल्डका लागि १९७८ देखि १९८० सम्म ७६ खेल खेले । त्यसपछि लिड्समा उनले २३ खेल खेलेका थिए । म्याराडोनासँग सम्झौता गर्न असफल भएपछि सेफिल्डले अर्जेन्टिनी क्लब रिभरप्लेटबाट साबेलालाई अनुबन्ध गरेको थियो ।
अर्को अर्जेन्टिनी क्लब एस्टुडियान्टेसलाई उनले प्रशिक्षकको रुपमा सन् २००९ मा दक्षिण अमेरिकी क्लब फुटबलको सबैभन्दा ठूलो प्रतियोगिता कोपा लिबर्टाडोरेस जिताएका थिए ।