पुर्व पाँच तौल समुहका वल्र्ड च्याम्पियन फ्लोएड मेवेदरले फेब्रुवरी २०२१ मा एक बिशेष फाइटमा युट्युबर लोगन पउलसँग भिड्ने घोषणा गरेका छन् ।
४३ बर्षिय अमेरिकन बक्सर मेवेदरले आफ्नो करिअर अवधिभर अपराजित रहदै ५० फाइट जितेपछि सन्यास लिएका थिए । बक्सिङ्ग इतिहासकै किर्तिमानी रकम उठेको खेलमा मेवेदरले २०१७ मा मिक्स्ड मार्सियल आर्ट्सका सनसनी कोनोर म्याकग्रेगरलाई पराजित गरेका थिए । त्यस यता उनले खेलेका छैनन् ।
२५ बर्षिय पउलले एक पटक मात्र खेलेको व्यवसायिक फाइटमा अर्का युट्युबर केएसआईलाई २०१९ मा हराएका थिए ।
युट्युबमा २२ मिलियन सब्सक्राइबर रहेका पउलले मेवेदरलाई धेरै पटक उक्साउदै आएका छन् भने दुवैले सामाजिक सञ्जालमा एक अर्कालाई बेइज्जत गरिरहदा कैयौं महिनासम्म यी दुई बीचको फाइट हुने आंकलन गरिएको थियो ।
गत हप्ता सामाजिक सञ्जालमै इन्फ्लुएन्सर रहेका पउलका भाइ जेकले माइक टाइसन र रोय जोन्सको प्रदर्शनी खेलका दौरान रिङ्गमा उत्रदा एनबिए खेलाडी नेट रबिन्सनलाई हराएका थिए ।
फेब्रुवरी २० मा हुने पउल र मेवेदरबीचको खेलले उल्लेख्य संख्यामा टेलिभिजनमा दर्शकलाई आकर्षित गर्दै राम्रै पैसा उठ्न सक्ने अनुमान गरिएको छ । उक्त खेलका लागि अमेरिकी जनताले आफ्नो टेलिभिजनमा हेर्नका लागि पैसा तिनु पर्ने छ । ‘मनि मेवेदेर’ का नामले पनि चर्चित फ्लोएड मेवेदरले एक युट्युबरसँग म्याचका लागि सहमति जनाएपछि पैसाको लागि उनले साख गिराएको भन्दै आलोचना गर्नेहरु पनि टन्नै छन् ।
डिसेम्बर २०१८ मा मेवेदरले जापानिज किक बक्सर तेन्सिन नासुकावासँग खेलेको प्रदर्शनी खेलले ९ मिलियन डलर कमाएको रिपोर्टहरु सार्वजनिक भएको थियो । मेवेदरले नासुकावालाई १ सय ४० सेकेण्डमै हराएका थिए ।
