पुर्व स्पेन तथा बार्सिलोना लेजेण्ड आन्द्रेस इनिएस्टाले गोल गर्दा जापानी क्लब भिसेल कोबे चिनको सांघाई सिआईपिजीमाथि २–० को जित हात पार्दै एसियन च्याम्पियन्स लिगको क्वार्टर–फाइनलमा प्रवेश गरेको छ ।
सोमबार दोहामा भएको खेलका लागि जापानी टोली मिश्रित भावनका साथ मैदानमा उत्रिएको थियो । यसै बर्षको शुरुवातमा जापानको माथिल्लो लिगमा इम्पेरर कप र सुपर कप जितेको थियो तर नोभेम्बरमा भने लगातार पाँच वटा जे लिग खेलमा पराजय व्यहोर्न पुगेको थियो ।
सोमबारको परिणामले भने भिसेल कोबेलाई महादेशीय क्लब उपाधिबाट मात्र तीन जित टाढा पुर्याएको छ । प्रतियोगिता शुरु हुदा भिसेल कोबेलाई कसैले पनि यति लामो यात्रा तय गर्ने सोचेका पनि थिएनन् । भिसेल कोबेका प्रशिक्षक आत्सुहिरो मिउराका लागि एक मात्र झड्का इनिएस्टाको इन्जुरी हो । इनिएस्टा ६५ औं मिनेटमा तिघ्रामा चोट लागेपछि मैदानबाट बाहिरिएका थिए ।
नोभेम्बर २५ मा अर्को चिनिया क्लब ग्वांवझाउ एभरग्राण्डेमाथि ३–१ को जित रच्दा प्रतियोगितामा पहिलो गोल गरेका इनिएस्टाले भिसेल कोबीका लागि प्रेरणादायी प्रदर्शन गरेका थिए । ३६ बर्षिय इनिएस्टाले आफूलाई चिनाएका पासहरु खेल्दै पोस्टमा पनि केही प्रहारहरु गरेका थिए ।
३१ औ मिनेटमा होतारु यामागुचीको पासमा इनिएस्टाले गोल गर्दै भिसेल कोबेलाई अग्रता दिलाएका थिए । दोश्रो हाफ शुरु भएको पाँच मिनेटपछि नै निसीले गोल गरेपछि जित सुनिश्चित भएको थियो ।
