मार्च यता एन्फिल्डमा समर्थकहरु फर्किएको दिन उल्भ्समाथि सशक्त प्रदर्शन गर्दै ४–० को जित पाएपछि लिभरपुल व्यवस्थापक योर्गन क्लोपले आफ्नो रौं ठाडो भएको बताएका छन् ।
कोरोनाका कारण प्रिमियर लिगमा दर्शक प्रवेशमा अनुमति बन्द भएको अन्तरालमा लिभरपुलले ३० बर्षको उपाधिको पर्खाइ अन्त्य गरेको थियो । र यस दौरान लिभरपुलले उपाधिको खुशीयाली आफ्ना समर्थकहरुसँग मनाउन पाएको थिएन ।
आइतबार करिब दुई हजार दर्शक एन्फिल्डमा प्रवेश गर्दा लिभरपुलले बिगुल बजाउदै सशक्त प्रदर्शनका साथ समर्थकहरुलाई खुशी बनायो । मोहम्मदा सलाहले पहिलो हाफको एक मात्र गोल गर्दा उल्भ्सले कुनै पनि समय लिभरपुलमाथि दवाब कायम राख्न सकेन ।
दोश्रो हाफमा जर्जिनियो वाइनाल्डम, जोल म्याटिप र नेल्सन सेमेडोले आत्मघाती गोल गरेपछि लिभरपुलले फराकिलो जित हात पारेको थियो । लिभरपुलको टोटन्ह्यामसँगै २४ अंक भएको छ तर गोल अन्तरमा दोश्रो स्थानमा रहेको छ ।
“यो खेल, वातावरणले गर्दा मेरो रौं नै ठाडो भयो । उनीहरुले टिमको एन्थम गाएपछिको माहौल नै निकै राम्रो थियो । मलाई यो यति राम्रो लाग्छ भनेर कहिल्यै महसुस नै भएन । यो पछिल्लो पटक फेब्रुवरीमा मात्र भएको थियो र अब हामी बिस्तारै सामान्य जीवनमा फर्किदै गइरहेका छौं, क्लोपले भने ।