नियमित कप्तान आरोन फिन्चको स्थान लिएका म्याथ्यु वेडको अद्र्धशतकसँगै अन्य तीन ब्याट्स्म्यानको उल्लेखनीय योगदानमा अष्ट्रेलियाले भारतलाई दोश्रो ट्वान्टी ट्वान्टी अन्तर्राष्ट्रियमा जितका लागि १ सय ९५ रनको बिशाल लक्ष्य दिएको छ ।
सिड्नीमा चोटका कारण फिन्च अनुपस्थित भएपछि वेडले नै अष्ट्रेलियाको इनिङ्गसको शुरुवात गर्दा घरेलु टोलीेले २० ओभरमा पाँच विकेट गुमाउदै १ सय ९४ रन बनायो । निकै छरितो रुपमा रन बटुल्दै वेडले पहिलो विकेटका लागि डार्सि शर्ट (९) सँग पाँच ओभरभित्रै ४७ रन बटुलेका थिए । शर्टको विकेट पतनपछि स्मिथसँग २८ रन जोड्दा वेडले ३२ बलमा १० चौका र एक छक्का प्रहार गरेका थिए ।
वासिँगटन सुन्दरको बलमा उनको सहज क्याच कप्तान बिराट कोहलीले छोडेपनि स्मिथसँग तालमेल नमिल्दा वेड रनआउट भएका थिए । त्यसपछि स्मिथले ग्लेन म्याक्सवेल (२२) सँग ४५ रन जोडे भने मोइजेज हेन्रिकेस (१८) सँग ४७ । चाहलको बलमा हार्दिक पाण्ड्याको बलमा क्याच आउट हुनु अघि स्मिथले ३८ बलमा तीन चौका र दुई छक्काको मद्दतमा ४६ रन बनाए ।
दिपक चाहरको अन्तिम ओभरमा १७ रन बनाएपछि घरेलु टोली २ सय रनको योगफल नजिक पुगेको थियो । अष्ट्रेलियाले अझै बढी रन बनाउने थियो तर टि नटराजनले एक पटक फेरि उत्कृष्ट बलिङ्ग गरेका थिए । पहिलो ट्वान्टी ट्वान्टीमा पनि उत्कृष्ट डेब्यु गर्दै तीन विकेट लिएका बाया हाते सिमर नटराजनले आइतबार १९ रनमात्र खर्चदै दुई विकेट लिएका थिए ।
भारत र अष्ट्रेलिया दुवैले खेलमा तीन परिवर्तन गरेका छन् ।