रविन्द्र जडेजाले डेथ ओभरमा उत्कृष्ट ब्याटिङ्ग गरेपछि भारतलाई अष्ट्रेलियालाई पहिलो ट्वान्टी ट्वान्टी अन्तर्राष्ट्रियमा जितका लागि एक सय ६२ रनको चुनौतिपूर्ण लक्ष्य दिएको छ ।
क्यानबेरामा टस हारी पहिलो ब्याटिङ्ग गरेको भारत निरन्तर विकेट गुमाउन पुग्दा सामान्य योगफम खुम्चिने देखिएको थियो । तर जडेजाले २३ बलमा ४४ रन बनाएपछि भारतले २० ओभरमा ७ विकेटको क्षतिमा एक सय ६१ रन बनायो ।
जोस हेजलउडको १९ औं ओभरमा आएको २३ मध्ये २२ रन नै जडेजाले प्रहार गर्दा भारत १ सय ६० को आंकडा पार गर्न सकेको थियो । यसअघि भारतले कुनै पनि समय ठूलो साभेदारी पाउन भने सकेन । सुस्त शुरुवातपछि तेश्रो ओभरमा शिखर धवनलाई गुमाएको भारतका लागि के एल राहुल र कप्तान बिराट कोहली (९) ले ३७ रन जोडे ।
राहुल र सन्जु स्यामसन (२३) ले अर्को ३६ रनको साझेदारी गरे तर अष्ट्रेलियाले ११ देखि १६ ओभरसम्म खेललाई पकडमा राख्दा भारत दवाबमा पर्यो । राहुलले ५० बलमा पाँच चौका र एक छक्काको मद्दतमा ५१ रन बनाए ।
अष्ट्रेलियाका लागि मोइजेज हेन्रिकेसले उत्कृष्ट बलिङ्ग गर्दै चार ओभरमा मात्र २१ रन खर्चदै तीन विकेट हात पारे । जडेजाको इनिङ्गसमा पाँच चौका र एक छक्का सामेल थियो ।
