शख्तर दोनेस्कसँग एक पटक फेरि स्तब्ध हुँदा च्याम्पियन्स लिगको दोश्रो चरणको यात्रा कठिन भएपनि रियल म्याड्रिड प्रशिक्षक जिनेदिन जिदानले आफू पदबाट राजीनामा नदिने बताएका छन् ।
पहिलो लेगमा घरमै ३–२ को हार ब्यहोरेको रियलले मङ्गलवार युक्रेनी क्लबसँग अवे खेलमा २–० को हार भोग्यो । १३ पटकको युरोपियन च्याम्पियन रियल समुह बी मा तेश्रो स्थानमा रहेको छ भने सबै टोलीको दोश्रो चरणमा पुग्ने सम्भावन उत्तिकै रहेको छ ।
जर्मन टोली बोरुसिया मोइचेनग्ल्याडबाच ८ अंक सहित पहिलो स्थानमा छ भने गोल अन्तरका आधारमा शख्तर ७ अंक सहित दोश्रो स्थानमा रहेको छ । ७ अंक नै रहेको रियल दुई अंकले इटालियन क्लब इन्टर मिलान भन्दा अगाडी रहेको छ ।
रियलले अब आफ्नो अन्तिम खेलमा मोइचेनग्ल्याडबाचलाई हराउनै पर्नेछ । “म राजीनामा दिने छैन, कुनै पनि हालतमा दिन्न, । हामी कठिन समयबाट गुज्रिरहेको छौं र अब अगाडी बढेर हेर्न आवश्यक छ,” हारपछि जिदानले भने । यो खेलमा आउनु अघि रियलले स्पेनिस लिगमा पनि आलाभेससँग २–१ को पराजय ब्यहोरेको थियो ।
“मसँग परिस्थितिलाई उल्टाउन चाहिए जतिको तागत छ र म टिमलाई दोश्रो स्थानमा पुर्याउन आफ्नो सबै दिनेछु र खेलाडीहरुले पनि दिनेछन् । हामीले राम्रो खेलेको हौं र धेरै कुराको हकदार थियौं । हामीले आफ्नो शिर ठाडो पार्दै अर्को खेलको बारे सोच्न आवश्यक छ,” उनले भने ।
मङ्गलवार पहिलो हाफ बराबरीमा रोकिएपछि डेन्टिन्होले शख्तरलाई ५७ औं मिनेटमा अग्रता दिलाएका थिए । म्यानोर सोलोमनले ८२ औं मिनेटमा गोल गर्दै शख्तरको जित सुनिश्चित पारेका थिए ।
इन्टरको अन्तिम १६ का आशा जिवितै राख्ने क्रममा रोमेलु लुकाकुले दुई गोल गरेपछि उसले मोइचेनग्ल्याडबाचलाई ३–२ ले हरायो । अवे खेलमा इन्टरले माटियो डार्मियनको गोलबाट अग्रता लिएको थियो । अलासाने प्लेयाले गोल गरेपछि पहिलो हाफ १–१ गोलको बराबरीमा टुँिगएको थियो ।
लुकाकुले दोश्रो हाफमा ९ मिनेटको अन्तरमा दुई गोल गर्दै इन्टरलाई दुई गोलको अग्रता दिलाएका थिए । प्लेयाले लगत्तै अर्को गोल गरे र ८३ औं मिनेटमा उनको अर्को गोल भिडियो असिस्टेन्ट रेफ्रिले मान्यता नदिएपछि इन्टरले महत्वपूर्ण तीन अंक हात पार्यो । इन्टरले अब अन्तिम खेलमा शख्तरलाई हराउनै पर्नेछ ।