युभेन्टस प्रशिक्षक आन्द्रे पिर्लोले पोर्चुगिज सुपरस्टार क्रिष्चियानो रोनाल्डोले उत्कृष्ट प्रदर्शन गर्दै क्लबको जितमा दुवै गोल गरेपछि उनको तारिफ गरेका छन् ।
रोनाल्डोले दुई गोल गरेपछि युभेन्टस काग्लियरीलाई २–० ले हराउदै इटालियन सिरी आ को दोश्रो स्थानमा उक्लिएको छ । युभेन्टसको ८ खेलबाट १६ अंक भएको छ भने शिर्ष स्थानमा एसि मिलानको ७ खेलबाट १७ रहेको छ ।
नापोलीलाई आइतबारको खेलमा हराउने हो भने एसि मिलानले चार अंकको स्पष्ट अग्रता भने कायम गर्नेछ । आइतबार नै हेलास भेरोनासँग खेल्न गइरहेको सासुलोको १५ अंक छ ।
रोनाल्डोले पछिल्लो पाँच खेलमा आठ गोल गरिसकेका छन् । “जब तपाईसँग रोनाल्डो जस्ता च्याम्पियन खेलाडी साथमा हुन्छन्,तपाई जुन पनि परिणाम प्राप्त गर्न सक्नु हुन्छ । उनी सबैको लागि एक उदाहरण हुन् र उनले यसरी नै खेलिदिए मात्रै पनि पुग्छ,” पिर्लोले खेलपछि भने ।
“हाम्रो लागि यस्तो परिणाम निकै महत्वपूर्ण थियो । हामीले शुरु देखि नै राम्रो खेल्यौं र पूर्ण रुपमा दवाब कायम सफल भयौं,” पुर्व युभेन्टस स्टार पिर्लोले भने ।
सिरी आ मा १४ अंक रहेका चारटिम मध्ये एट्लान्टा र लाजियो पनि रहेका छन् । लाजियोले शनिबार नै क्रोटोनलाई २–० ले हराएको थियो भने एट्लान्टा अप्रत्याशित रुपमा स्पेजियासँग गोलरहित बराबरीमा रोकिएको थियो ।
