युसुफा मुकोकोले बुन्डेसलिगामा डेब्यु गर्ने सबैभन्दा कान्छा खेलाडी बन्दै नयाँ किर्तिमान कायम गर्दा बोरुसिया डर्टमण्डले एर्लिङ हालान्डको चार गोलको मद्दतमा हर्था बर्लिनलाई ५–२ को फराकिलो अन्तरले पराजित गरेको छ ।
शुक्रबार १६ बर्ष पुगेपछि डेब्यु गर्न योग्य भएपछि शनिबारको खेल मुकोकोको वरिपरि नै घुमेको थियो । तर बर्लिनको चिसो रातलाई हालन्डको उत्कृष्ट खेलले ततायो । हालान्डले चार गोल गरेपछि उनकै स्थानमा मुकोको ८५ औं मिनेटमा मैदान प्रवेश गरेका थिए ।
“मलाई लाग्छ मुकोको संसारकै सबैभन्दा ठूलो प्रतिभा हुन् । १६ बर्ष एक दिनको उमेरमा डेब्यु गर्नु साच्चिकै अचम्मको उपलब्धि हो । म अहिले २० बर्ष कटिसके र बुढो भइसके जस्तो लाग्दैछ,” हालान्डले ठट्टा गर्दै भने ।
पहिलो हाफमा निकै प्रतिस्पर्धात्मक रहेको खेलमा हर्था बर्लिनले ३३ औं मिनेटमा गोल गर्दै अग्रता लिएको थियो । तर दोश्रो हाफ पूर्ण रुपमा डर्टमण्ड, बिशेषत, हालान्डको नियन्त्रणमा रह्यो । उनले लगातार तीन गोल गर्दा डर्टमण्डले ६२ औं मिनेटसम्म ३–१ को अग्रता बनाइसकेको थियो ।
राफेल गुरेरो ७० औं मिनेटमा चौथो गोल गरे । बर्लिनले दोश्रो गोल फर्काएको एक मिनेट भित्रै हालान्डाले चौथो गोल गरेका थिए । बर्लिनका लागि दुवै गोल माथिउस कुन्हाले गरेका थिए ।
शिर्ष स्थानको बायर्न म्युनिख भने वर्डर ब्रेमनसँग १–१ गोलको बराबरीमा रोकिदा उसको सबै प्रतियोगितामा हात पारेको लगातार ९ खेलको जितको श्रंखलामा पूर्णविराम लाग्न पुग्यो । म्याक्सिमिलियन एगेस्टेनले पहिलो हाफमा ब्रेमनलाई अग्रता दिलाएका थिए भने किँगसले कोमनले ६२ औं मिनेटमा बराबरी गोल गरेका थिए ।
२०१० को सेप्टेम्बरको गोलरहित बराबरीपछि ब्रेमनले पहिलो पटक बायर्नलाई बराबरीमा रोकेको हो । ८ चरणको समाप्तिपछि बायर्नको १९ अंक रहेको छ भने डर्टमण्ड मात्रै एक अंकले पछाडी छ । बायर लेभरकुसन (१८) र आरबी लाइपजिग (१७) तेश्रो र चौथो स्थानमा रहेका छन् ।
