नेपाल क्रिकेट संघ (क्यान) ले अन्तरास्ट्रिय प्रतियोगिताहरुलाई मध्य नजर गर्दै बन्द प्रशिक्षण सुरु गर्ने भएको छ ।
क्यानले आज विज्ञप्ति जारी गर्दै यहि मंसिर १० गतेबाट गर्ने बन्द प्रशिक्षणका लागि २२ जना खेलाडीको नाम सार्वजनिक गरेको छ । यसका लागि क्यानले खेलाडीहरुलाई आठ गते उपस्थित हुँदै पिसीआर परिक्षण गर्ने तथा पिसीआर रिपोर्ट नेगेटिभ आउने खेलाडीलाई मात्र बन्द प्रशिक्षणमा सामेल गराउने जनाएको छ ।
पछिल्लो पटक फाल्गुनमा थाईल्याण्डमा आयोजना भएको एसीसी ट्वान्टी ट्वान्टी एसिया कप छनोट पछि कोरोनाका कारण नेपाली टोलीले कुनै पनि प्रतियोगिता खेलेको छैन । त्यस्तै नेपाली टोलीले खेल्न पर्ने विश्वकप लिग टुका खेलहरु पनि सबै स्थगित भएका थिए ।
क्यानले पूर्णकालिन प्रशिक्षक नराखे सम्मका लागि हालको लागि जगत टमाट्टालाई प्रशिक्षकको जिम्मा दिएको छ । क्यानले केहि दिन अघि मात्र प्रशिक्षकहरुसँग अन्तर्वार्ता लिएको थियो भने अब केहि समयमा नै प्रशिक्षक नियुक्ती गर्ने जनाएको थियो ।