उरुग्वेका सर्वाधिक गोलकर्ता तथा स्ट्राइकर लुइस सुवारेजलाई कोरोना भाइरस संक्रमण भएपछि उनले ब्राजिल बिरुद्धको २०२२ कतार बिश्वकपको दक्षिण अमेरिकी छनोट गुमाउने भएका छन् ।
सुवारेजको टेस्ट पोजिटिभ आएपछि उनले एट्लेटिको म्याड्रिडका लागि आफ्नो पुर्व क्लब बार्सिलोनाबिरुद्धको खेल पनि गुमाउने छन् । सुवारेजसँगै अर्का खेलाडी रोद्रिगो मुनोज र अफिसियल मातियस फारल पनि पोजिटिभ देखिएको तर सबैको स्वास्थ्य सामान्य रहेको उरुग्वे फुटबल महासंघले जनाएको छ ।
उरुग्वेले आफ्नो अघिल्लो छनोट खेलमा कोलम्बियालाई ३–० ले पराजित गरेपछि डिफेण्डर मातियस भिनालाई पनि कोरोना देखिएको थियो ।
सन् २००१ यता ब्राजिललाई पराजित गर्न नसकेको उरुग्वेले पाँच पटकको बिश्वकप बिजेतासँग मोन्टेभिडियोमा मंगलवार खेल्न गइरहेको छ । ब्राजिल पनि आफ्ना सुपरस्टार स्ट्राइकर बिना खेल्नेछ । चोटग्रस्त रहेका नेमारले भेनेजुएलाबिरुद्ध यसअघिको छनोट खेल पनि गुमाएका थिए ।
आफ्नो शुरुवाती तीन वटै खेल जितेको ब्राजिल दक्षिण अमेरिकी छनोटको शिर्ष स्थानमा रहेको छ । ९ अंक रहेको ब्राजिलभन्दा अर्जेन्टिना दुई अंकले पछाडी रहेको छ । उरुग्वे र इक्वेडरको समान ६ अंक रहेको छ ।
