मुम्बई इन्डियन्स माथि १० विकेटको फराकिलो जित हात पार्दै सनराईजर्स हैदराबादले १३ औं संस्करणको इन्डियन प्रिमियर (आईपीएल) को अन्तिम चारमा आफ्नो स्थान सुरक्षित गरेको छ । हैदराबादले अब पहिलो एलिमिनेटरमा रोयल च्यालेन्जर्स बेंगलोरको सामना गर्नेछ ।
आजको खेलमा जित निकाले पछि हैदराबाद अंक तालिकाको तेश्रो स्थानमा उक्लंदै अन्तिम चारमा प्रवेस पाएको हो । हैदराबादको जित पछि कोलकाता नाइट राईडर्स भने प्रतियोगिताबाट बाहिरिएको छ ।
जितका लागि १५० रनको मध्यम लक्ष्य लिएर ब्याटिङमा आएको हैदराबादले १७ दशमलब एक ओभर खेल्दै कुनै पनि विकेट नगुमाइ लक्ष्य पार गरेको हो ।
हैदराबादको जितमा कप्तान डेभिड वार्नरले सर्वाधिक ८५ रन बनाए भने रिद्दीमन शाहले पनि ५८ रनको पारी खेले । अविजित रहेका उनीहरुले क्रमश ५८ बलमा १० चौका र एक छक्का तथा ४५ बलमा सात चौका र एक छक्का प्रहार गरे ।
यस अघि हैदराबादका बलरहरु हाबी हुँदा शारजाह क्रिकेट रंगशालामा टस हारेर पहिले ब्याटिङ गरेको मुम्बईले पुरै २० ओभर खेल्दै आठ विकेटको नोक्सानीमा १४९ रन मात्र बनाउन सक्यो ।
मुम्बईको तर्फबाट काइरन पोलार्डले सर्वाधिक ४१ रन बनाए । सातौं नम्बरमा ब्याटिङ गर्न आएका पोलार्डले अन्तिम ओभरमा आउट हुनु अघि २५ बलको सामना गर्दै दुई चौका र चार छक्का प्रहार गरे । मुम्बईका अन्य ब्याट्सम्यानहरुमा सुर्य कुमार यादव ३६, इशान किशान ३३ र ओपनर क्विन्टन डि कक २५ रन बनाएर आउट भए भने अन्य ब्याट्सम्यानले दोहोरो अंकमा रन जोड्न सकेनन् ।
मुम्बईलाई मध्यम स्कोरमा रोक्ने क्रममा सन्दिप शर्माले सर्वाधिक सर्वाधिक तीन विकेट लिए भने जेसन होल्डर र शहबाज नदिमले पनि समान २-२ विकेट आफ्नो नाममा दर्ता गराए ।
मुम्बई यस अघि नै क्वालीफायर्समा पुगी सकेको छ र उसले फाइनल प्रवेसका लागि दिल्ली क्यापपिटल्सको सामना गर्नेछ । त्यस्तै हिजो सम्पन्न खेलमा दिल्लीसँग छ विकेटले पराजित भए पनि रोयल च्यालेन्जर्स बेंगलोरले अन्तिम चारमा स्थान पक्का गर्न सफल भएको थियो । आजको खेलमा हैदराबादले जित हात पार्दा बेंगलोर अंक तालिकाको चौथों स्थानमा झरेको छ ।
यस अघि सम्पन्न पहिलो लेगमा भने मुम्बईले हैदराबादलाई ३४ रनले पराजित गरेको थियो । मुम्बईले पहिले ब्याटिङ गर्दै २० ओभरमा पाँच विकेटको नोक्सानीमा २०८ रन बनायो भने जवाफी ब्याटिङ गरेको हैदराबादले पुरै २० ओभर खेल्दै सात विकेटको नोक्सानीमा १७४ रन मात्र बनाउन सक्यो ।
