ग्लेन फिलिप्सले न्युजिल्याण्डको लागि सबैभन्दा तिब्र ट्वान्टी ट्वान्टी अन्तर्राष्ट्रिय शतक पुरा गरेपछि न्युजिल्याण्डले दोश्रो ट्वान्टी ट्वान्टीमा वेष्ट इण्डिजलाई ७२ रनको फराकिलो अन्तरले पराजित गर्दै श्रृंखलामा आफ्नो पक्षमा पारेको छ ।
आफ्नो १३ औं ट्वान्टी ट्वान्टी अन्तर्राष्ट्रियमा ४६ बलमै पहिलो शतक बनाउदै नयाँ किर्तिमान कायम गरेपछि टस हारी पहिलो ब्याटिङ्ग गरेको न्युजिल्याण्डले २० ओभरमा मात्र तीन विकेट गुमाउदै २ सय ३८ रन बनायो । जवाफमा वेष्ट इण्डिजले ९ विकेटको क्षतिमा १ सय ६६ रन मात्र बनाउने सक्यो ।
बिशाल लक्ष्यको दवाबमा शुरुदेखि नै विकेट गुमाएको वेष्ट इण्डिजका लागि सिम्रोन हेट्मायर र काइल मायर्सले तेश्रो विकेटको लागि ३२ रनको साझेदारी गर्दै टिमलाई सम्हाल्ने प्रयास गरेपनि त्यो पर्याप्त थिएन । कायरोन पोलार्डले मिचेल स्यान्ट्नरलाई लगातार ३ छक्का प्रहार गर्दै केही आशा दिलाएपनि वेष्ट इण्डिज भारी लक्ष्यको दवाबमा परेको थियो ।
पाचौं विकेटका लागि रोभमान पावेलसँग ३५ रनको साझेदारी गरेका पोलार्डले सर्वाधिक २८ रन बनाए । पहिलो ट्वान्टी ट्वान्टी ३७ बलमै ७५ रन ठोकेका पोलार्डले आइतबार १५ बलको सामना गरेका थिए । हेट्मायरले २५ र मायर्सले २० रन बनाए । यस्तै नवौं नम्बरमा ब्याटिङ्ग गर्न आएका किमो पउलले १८ बलमा २६ रन बनाए । उनले तीन छक्का प्रहार गरेका थिए ।
न्युजिल्याण्डका लागि स्यान्ट्नर र कायल जेमिसनले दुई–दुई विकेट लिएका थिए ।
यसअघि ५३ रनमा दुई विकेट गुमाएको न्युजिल्याण्डलाई बिशाल योगफलतर्फ डोर्याउदै फिलिप्सले तेश्रो विकेटका लागि डेभोन कोन्वेसँग १ सय ८४ रनको शान्दार साझेदारी गरेका थिए ।
अन्तिम ओभरको पाचौं बलमा आउट भएका फिलिप्सले ५१ बलको सामना गर्दै १० चौका र ८ छक्को मद्दतमा १ सय ८ रन बनाए । उनले न्युजिल्याण्डका लागि यसअघि कोलिन मुन्रोले बनाएको ४७ बलको शतकको किर्तिमान तोडेका थिए ।
पहिलो ट्वान्टी ट्वान्टीमा पनि न्युजिल्याण्डको जितमा प्रमुख भुमिका खेलेका कोन्वेले ३७ बलमा नटआउट ६५ रन बनाए । कोन्वेले चार चौका र चार छक्का प्रहार गरे । यस्तै ओपनर मार्टिन गप्टिलले पाँच चौका र दुई छक्का सहित २३ बलमा ३४ रन बनाएका थिए । वेष्ट इण्डिजले पहिलो ट्वान्टी ट्वान्टीमा १६ ओभरमै १ सय ८० रन बनाएपनि हारको सामना गरेको थियो ।
