डिएगो म्याराडोनाका लामो समयदेखिका वकिल सँग–सँगै एजेन्ट पनि रहेका मटियास मोर्लाले फुटबलका हस्ती घरमा एम्बुलेन्स समयमै किन नआइपुगेको भन्दै छानबिन गर्न माग गरेका छन् ।
म्याराडोनाका प्रवक्ता सेबास्चियन साच्चीका अनुसार उनको ६० वर्षको उमेरमा मंगलबार हृदयघातका कारण मृत्यु भएको थियो । सान ईसिद्रो जिल्ला वकिलको कार्यालयको रिपोर्ट अनुसार म्याराडोनाको घरमा एम्बुलेन्स पुग्न आधा घन्टाभन्दा बढी लागेको बिषयमा उनले शंका ब्यक्त गरेका छन् ।
उनले यो घटनालाई “आपराधिक मुर्खता” समेत भनेका छन् । “म यो घटनालाई नदेखे जस्तो गर्न सक्दिन र भन्न चाहन्छु कि प्रहरीले यो घटनाको पूर्ण हदसम्म अनुसन्धान गर्नेछ,” उनले थपे ।
म्यारोडोनाले अर्जेन्टिनालाई १९८६ को विश्वकप जिताएका थिए भने १९९० को विश्वकपको फाइनल पुर्याएका थिए । उनलाई अर्जेन्टिनामा लाखौं मानिसले पुज्ने गरेका छन् भने इटालीको नेपल्समा पनि उनलाई भगवान मान्ने गरिन्छ ।
म्यारोडोनालाई अन्तिम पटक हेर्न बिहीबार राजधानी बुनोस आएर्समा रहेको राष्ट्रपति महल बहिर हजारौँ मानिसहरु जम्मा भएका थिए ।
