युरोपा लिगमा रियेकालाई २–० ले पराजित गर्दै नापोलीले आफ्ना अर्जेन्टिनी आइकन डिएगो म्याराडोनाको मृत्यु पछि पहिलो खेल खेल्दै उनलाई बिशेष सम्मान दिएको छ ।
जेनारो गाट्टुसोको टोलीका सम्पूर्ण खेलाडीहरुले म्याराडोनाको १० नम्बरको जर्सी लगाएर मैदानमा उत्रदै निकै कमजोर नापोलीलाई १९८७ र १९९० को इटालियन सिरी आ च्याम्पियन बनाएका पुर्व स्टारलाई सम्झिएको थियो । म्याराडोनाले नापोलीलाई १९८९ को युएफा कप (त्यो समयको च्याम्पियन्स लिग) पनि जिताएका थिए ।
डिएगो लिजेण्ड थिए र कहिल्यै पनि मर्ने छैनन् । नापोली शहरले हिजोदेखि फरक वातावरणमा स्वास फेरिरहेको थियो । हामी उनलाई बिशेष सम्मान दिदै उपाधि नै जित्न चाहन्छौं । यो शहरमा हामीले यस बिषयमा धेरै बर्षदेखि कुरा गर्दै आइरहेका छौं, गाट्टुसोले भने ।
म्याराडोनालाई सम्मान दिनका लागि नेपल्समा स्टेडियमबाहिर उपस्थित हजारौं समर्थकलाई नापालीले निराश बनाएन । अर्मान्डो एनास्टासियोको आत्मघाती गोल र हर्भिङ्ग लोजानोको उत्कृष्ट फिनिसिङ्गमा नापोली सहज जित हात पार्दै समुह एफमा शिर्ष स्थानमा उक्लियो । अल्कमार र रियल सोसिडाडले गोलरहित बराबरी खेलेपछि नापोली दुई क्लबसँग दुई अंकको दुरीमा रहेको छ ।
अर्को इटालियन टोली एएस रोमा भने रोमानियन क्लब क्लुजलाई २–० ले पराजित गर्दै दोश्रो चरणमा प्रवेश गर्यो । होफेन्हाइमले पनि समह एल बाट दोश्रो चरणमा स्थान बनायो ।
इङ्गलिस क्लबहरु आर्सनल, लेस्टर सिटी र टोटेन्ह्याम हट्स्परले पनि अन्तिम ३२ मा स्थान बनाएका छन् । लेस्टरलाई ब्रागाबिरुद्धको ३–३ गोलको बराबरी पर्याप्त थियो भने आर्सनलले मोल्डेलाई ३–० ले हरायो । टोटेन्ह्यामले बेल्जियन टोली रोयल एन्टवर्पलाई ४–० को फराकिलो अन्तरले पराजित गर्यो ।
