युनिभर्सल बोस क्रिस गेलले शतक बनाउनबाट चुके पनि इन्डियन प्रिमियर लिग (आईपीएल) अन्तर्गत ५० औं खेलमा किंग्स ११ पन्जाबले राजस्थान रोयल्सलाई १८६ रनको विशाल लक्ष्य दिएको छ ।
शेख जायद क्रिकेट रंगशाला, अबुधबीमा टस हारेर पहिले ब्याटिङ गरेको पन्जाबले पुरै २० ओभर खेल्दै चार विकेट गुमाएर १८५ रन बनायो ।
अन्तिम ओभरको चौथों बलमा जोफ्रा आर्चरको बलमा बोल्ड भएका क्रिस गेलले पन्जाबको तर्फबाट सर्वाधिक ९९ रन बनाए । ६३ बलको सामना गरेका उनले छ चौका र आठ छक्का प्रहार गरे । यसै बीच गेलले ट्वान्टी ट्वान्टीमा आफ्नो एक हजार छक्का पनि प्रहार गर्न भ्याए ।
जित्नै पर्ने खेलमा पन्जाबले खराब सुरुवात गर्यो । ओपनिङमा आएका मन्दिप सिंह पहिलो ओभरको अन्तिम बलमा गोल्डेन डक आउट हुन पुगे । त्यस पछि ब्याटिङमा आएका गेलले कप्तान राहुलसँग मिलेर दोश्रो विकेटका लागि १२० रनको साझेदारी गर्दै पन्जाबको पारी सम्हाले । ४१ बल खेल्दै तीन चौका र दुई छक्काको मद्धतमा ४६ रन बनाएका राहुल बेन स्टोक्सको शिकार भए ।
राहुलको विकेटको पतन पछि ब्याटिङमा आएका निकोलस पुरणले गेलसँग मिलेर तेश्रो विकेटका लागि ४१ रनको साझेदारी गरे । १० बलमा २२ रन बनाएका पुरण पनि स्टोक्सको नै बलमा आउट भए ।
राजस्थानका जोफ्रा आर्चर र बेन स्टोक्सले सामना चार चार ओभर बलिङ गर्दै क्रमश २६ र ३२ रन खर्चिएर समान २-२ विकेट हात पारे ।
आजको खेलमा पन्जाबले कुनै पनि परिवर्तन गरेको छैन भने राजस्थानले एक मात्र परिवर्तन गरेको छ । अंकित राजपुतको स्थानमा वरुण आरोनले सुरुवाती ११ मा स्थान बनाएका छन् ।
पन्जाब १२ खेल खेल्दै छ जितका साथ अंक तालिकाको चौथों स्थानमा छ भने १२ खेलमा नै पाँच जित दर्ता गराएको राजस्थान १० अंक सहित अंक तालिकाको सातौं स्थानमा रहेको छ । पन्जाबले छ खेलमा हारको सामना गरेको छ भने राजस्थानले सात खेलमा पराजय भोगेको छ ।
पन्जाबले आजको खेलमा जित निकालेको खण्डमा प्लेअफबाट एक कदम टाढा हुनेछ छ भने हार व्यहोरेमा प्ले-अफमा पुग्नका लागि अरुको नतिजामा निर्भर रहनु पर्ने छ । राजस्थानले भने प्ले-अफको आशा जीवित राख्न आजको खेल जित्नै पर्ने हुन्छ । आजको खेलमा पराजित भएमा प्रतियोगिताबाट बाहिरिने छ भने प्ले अफमा पुग्न आजको र आफ्नो अन्तिम खेलमा जित दर्ता गराउन पर्नेछ ।
यस अघि भएको पहिलो लेगमा राजस्थानले पन्जाब माथि चार विकेटको रोमान्चक जित हात पारेको थियो । पन्जाबले दिएको २२४ रनको लक्ष्य राजस्थानले १९ दशमलब तीन ओभरमा छ विकेटको नोक्सानीमा जित दर्ता गराएको थियो ।