पारीको अन्त्य तिर हार्दिक पान्ड्याले तुफानी पारी खेल्दै अर्धशतक प्रहार गरे पछि इन्डियन प्रिमियर लिग (आईपीएल) को ४५औं खेलमा मुम्बई इन्डियन्सले राजस्थान रोयल्सलाई १९६ रनको लक्ष्य दिएको छ ।
खेलमा टस जितेर पहिले ब्याटिङ गरेको मुम्बईले पुरै २० ओभर खेल्दै पाँच विकेटको नोक्सानीमा १९६ रन बनायो ।
मुम्बईको तर्फबाट छैठौं नम्बरमा ब्याटिङ गर्न आएका पान्ड्याले २१ बलको सामना गर्दै अविजित ६० रन बनाए । तुफानी पारी खेलेका उनले दुई चौका र सात छक्का प्रहार गरे । पान्ड्याले कार्तिक त्यागीको अन्तिम ओभरमा तीन छक्का र दुई चौका प्रहार गर्दै मुम्बईलाई विशाल योगफल सम्म पुर्याय ।
त्यस्तै मुम्बईका अन्य ब्याट्सम्यानहरुमा सुर्य कुमार यादवले २६ बलमा ४० रन, ओपनर इशान किशानले ३७ रन तथा सौरभ तिवारीले २५ बलमा ३४ रनको योगदान दिए ।
राजस्थानका श्रेयस गोपाल र र जोफ्रा आर्चरले समान २-२ विकेट लिए भने कार्तिक त्यागीले पनि आफ्नो नाममा एक विकेट आफ्नो नाममा दर्ता गराए ।
१० खेल खेलेको मुम्बई १४ अंक सहित अंक तालिकाको पहिलो स्थानमा रहेको छ भने आठ अंक रहेको राजस्थान अंक तालिकाको पुछारमा छ ।
यस अघि भएको पहिलो लेगमा मुम्बईले राजस्थानलाई ५७ रनको फराकिलो अन्तरले पराजित गरेको थियो । पहिले ब्याटिङ गरेको मुम्बईले चार विकेटको नोक्सानीमा १९३ रन बनायो भने जवाफी ब्याटिङ गरेको राजस्थानले १८ दशमलब एक ओभरमा आफ्ना सबै विकेट गुमाएर १३६ रन मात्र बनाउन सक्यो ।
