एबी डि भिलियर्सको आक्रमक अर्धशतकको मद्धतमा इन्डियन प्रिमियर लिग (आईपीएल) अन्तर्गत आफ्नो नवौं खेलमा रोयल च्यालेन्जर्स बेंगलोरले राजस्थान रोयल्स माथि सात विकेटको रोमान्चक जित दर्ता गराएको छ ।
आजको जितका बाबजुद बेंगलोर अंक तालिकाको तेश्रो स्थानमा नै रहेको छ भने राजस्थान अंक तालिकामा सातौं स्थानमा नै छ । नौं खेलमा बेंगलोरको यो छैठौं जित हो भने राजस्थानको छैठौं हार हो । एक खेल कम खेलेका मुम्बई इन्डियन्स र दिल्ली क्यापिटल्सको पनि समान १२-१२ अंक नै रहे पनि अंक तालिकामा क्रमश पहिलो र दोश्रो स्थानमा छन् ।
१७८ रनको लक्ष्य सहित ब्याटिङमा आएको बेंगलोरले १९ दशमलब चार ओभर खेल्दै तीन विकेटको नोक्सानीमा जित आत्मसाथ गरेको हो ।
बेंगलोरको जितमा एबी डि भिलियर्सले अविजित रहँदै सर्वाधिक ५५ रन बनाए । २२ बलको सामना गरेका उनले एक चौका र छ छक्का प्रहार गरे । बेंगलोरलाई रोमान्चक जित दिलाउने क्रममा तुफानी पारी खेलेका डि भिलियर्सले १७ बलमा १९ रन बनाएका गुरकिरत सिंहसँग मिलेर छ दशमलब तीन ओभरमा चौथों विकेटका लागि अविजित ७७ रनको साझेदारी गरे ।
बेंगलोरका ओपनर आरोन फ़िञ्च ११ बलमा १४ रन मात्र बनाएर आउट भए पनि अर्का ओपनर देवदत्त पडिकल र कप्तान विराट कोहलीले दोश्रो विकेटको लागि ७९ रनको साझेदारी गर्दै बेंगलोर पारी सम्हाले । तर दुई बलको अन्तरालमा ३७ बलमा ३५ रन बनाएका पडिकल र ३२ बलमा ४३ रन बनाएका कोहली आउट हुँदा बेंगलोर १३ दशमलब एक ओभरमा तीन विकेटको नोक्सानीमा १०२ रनको स्थितीमा पुग्यो ।
यस अघि खेलमा टस जितेर पहिले ब्याटिङ गरेको राजस्थानले पुरै २० ओभर खेल्दै छ विकेटको नोक्सानीमा १७७ रन बनायो ।
राजस्थानका ओपनरद्वय रविन उथप्पा र बेन सटोक्स पहिलो विकेटका लागि पाँच दशमलब चार ओभरमा ५० रनको साझेदारी गर्दै राम्रो सुरुवात दिए । १९ बलमा १५ रन बनाएका स्टोक्स आउट भए पनि उथप्पाले ठुलो सट खेल्न छाडेनन् ।
तर आठौं ओभरको चौथों र पाँचौं बलमा युज्बेन्द्र चाहालले २२ बलमा सात चौका र एक छक्का सहित ४१ रन बनाएका उथप्पा र छ बलमा नौं रन बनाएका सन्जु सामसनको विकेट निकाल्दै बेंगलोरलाई खेलमा फर्काउने प्रयास गरे ।
कप्तान स्टिभ स्मिथ र जस बटलरले चौथों विकेटका लागि ४६ बलमा ५८ रन जोड्दै राजस्थानको पारी सम्हाले । तर २५ बलमा २४ रन बनाएका बटलर क्रिस मोरिसको बलमा आउट हुन पुगे । राजस्थाको पारीको अन्तिम ओभरमा आउट भएका स्मिथले ३६ बल खेल्दै छ चौका र एक छक्काको मद्धतमा सर्वाधिक ५७ रन बनाए । राहुल टेवाटिया १९ रनमा अविजित रहे ।
बेंगलोरका क्रिस मोरिसले चार ओभर बलिङ गर्दै २६ रन खर्चिएर सर्वाधिक चार विकेट लिए भने युज्बेन्द्र चाहालले पनि चार ओभरमा नै ३४ रन दिंदै दुई विकेट आफ्नो नाममा दर्ता गराए ।