दक्षिण अमेरिकामा भैरहेको विश्वकप २०२२ छनोटमा पेरु विरुद्ध ह्याट्रिक गरे पछि नेमारले रोनाल्डोलाई उछिन्दै ब्राजिलका लागि सार्वधिक गोल गर्ने खेलाडीको सुचीमा दोस्रो स्थानमा उक्लिएका छन् ।
दुई पेनाल्टी र इन्जुरी समयमा एक गोल गर्दै ह्याट्रिक पुरा गरेका पेरिस सेन्ट जार्माइनका स्टार खेलाडी नेमारले ब्राजिललाई ४-२ को जित दिलाएका थिए ।
नेमारले ब्राजिलका लागि १०३ खेल खेल्दै ६४ गोल गरेका छन् । २८ वर्षिय नेमारले पेरु विरुद्ध भएको खेलमा ह्याट्रिक गरे पछि माथि उक्लिएका हुन् ।
रोनाल्डोले १७ वर्षिय लामो करियरमा ब्राजिलका लागि ९८ खेल खेल्दै ६२ गोल गरेका थिए । रोनाल्डोले ब्राजिललाई विश्वकप, कोपा अमेरिका देखी कन्फिडेरेसन कप सम्म जिताएका थिए । उनलाई ब्राजिलमा लेजेण्डको रुपमा हेरिन्छ ।
सर्वधिक गोलकर्ताको शिर्ष स्थानमा भने पेले रहेका छन् । उनले ब्राजिलका लागि ७७ गोल गरेका थिए ।
नेमारलाई ब्राजिलमा एक सुपरस्टारको नजरले हेर्ने गरिन्छ भने आउने विश्वकपमा उनले ब्राजिललाई छैठौ विश्वकप दिलाउने ब्राजिलियनहरुले आशा गरेका छन् ।
