इन्डियन प्रिमियर लिग (आईपीएल) अन्तर्गत आजको दोश्रो खेलमा रोयल च्यालेन्जर्स बेंगलोरले चेन्नाई सुपर किंग्स विरुद्धको खेलमा पहिले ब्याटिङ गर्ने भएको छ । दुबई अन्तरास्ट्रिय क्रिकेट रंगशालामा बेंगलोरका कप्तान बिराट कोहलीले टस जितेर पहिले ब्याटिङ गर्ने निर्णय गरेका हुन् ।
आजको खेलमा बेंगलोरले एक परिवर्तन गरेको छ । यस अघि चोटका कारण टोलीमा नपरेका क्रिस मोरिस आज मोइन अलीको स्थानमा सुरुवाती ११ मा पर्न सफल भएका छन् । चेन्नाईले पनि आजको खेलमा एक परिवर्तन गरेको छ । उसले केदार जाधवको स्थानमा एन जगदिसानलाई खेलाउने भएको छ ।
छ खेल खेलेको चेन्नाई दुई जित र चार हारका साथ अंक तालिकाको छैठौं स्थानमा रहेको छ भने एक खेल कम खेलेको बेंगलोर पाँचौं स्थानमा रहेको छ । बेंगलोरले तीन जित दर्ता दुई खेलमा हारको सामना गरेको छ ।
दुई टोली बीचको आईपीएलको खेल हेर्ने हो भने चेन्नाई बेंगलोर माथि हाबी रहेको छ ।२४ पटक एक आपसमा भिड्दा १५ खेलमा चेन्नाईले र आठ खेलमा बेंगलोरले जित हात पारेका छन् । एक खेल भने वर्षाका कारण रद्द हुन पुगेको थियो । पछिल्लो पाँच खेल मध्य चेन्नाईले चार खेलमा जित दर्ता गराउँदा बेंगलोरले एक खेलमा मात्र जित आत्मसाथ गर्न सकेको थियो ।
