मोटरसाइकल दुर्घटनामा परेर हस्पिटलमा उपचारार्थ राष्ट्रिय क्रिकेट टोलीका बाया हाते तिब्र गतिका बलर ललित सिंह भण्डारी हस्पिटलबाट २५ दिन पछि हस्पिटलबाट डिस्चार्ज भएका छन् ।
गत भदौ २८ गते झलारी बजारमा ललितले चलाएको म २ प ४७०५ नम्बरको मोटरसाइकललाई महेन्द्रनगरतर्फ गइरहेको से १ ख १३२४ नम्बरको ट्रकले ठक्कर दिंदा उनी घाइते भएका थिए ।
धनगढीको निसर्ग हस्पिटलमा उपचार पूर्ण रुपले सम्भव नभएपछि एम्बुलेन्समा ललितलाई कोहलपुर शिक्षण अस्पताल लगिएको थियो । कोहलपुरमा पनि ललितको उपचार सम्भव नभए पछि उनलाई हेलिकप्टरबाट काठमाडौं ल्याइएको थियो ।
दुर्घटनामा उनको हात र खुट्टामा गम्भिर चोट लागेका कारण शल्यक्रिया नै गर्न पर्ने भएको थियो । ललितको ग्रान्डी हस्पिटलमा यहि असोज एक गते सफल शल्यक्रिया सम्पन्न भएको थियो ।
दुर्घट्नामा ललितसँगै रहेका उनको नाता पर्ने २४ बर्षिय करण ठगुन्ना भने सामान्य घाइते भएका थिए ।
डिसेम्बर ६ मा आईसिसिसि वल्र्ड क्रिकेट लिग च्याम्पियनसिप अन्तर्गत युएईबिरुद्ध नेपालका लागि डेब्यु गरेका ललितले नेपालको ऐतिहासिक पहिलो दुई एकदिवसीय मध्यै दोश्रो म्याचमा एकदिवसीय अन्तर्राष्ट्रियमा पनि डेब्यु गरिसकेका छन् ।
उनले अगष्ट ३ मा नेदरल्याण्ड्सबिरुद्ध एम्स्टलभिनमा पहिलो ओडिआई खेलका थिए भने उक्त खेलमा ललितले दुई विकेट पनि लिएका थिए । घरेलु क्रिकेटमा नेपाल पुलिस क्लबबाट खेल्ने गरेका ललित फ्रान्चाइज लिगहरुमा पनि प्रमुख खेलाडीको रुपमा रहने गरेका छन् ।
यसै बीच क्रिकेट खेलाडी संघ नेपाल (सिप्यान) ले ललितको सहयोगार्थ संचालन गरेको अभियानबाट संकलन गरेको रकम पनि आजै हस्तान्तरण गरेको छ । अभियानबाट कुल कुल १० लाख उठेको थियो । जस मध्य तीन लाख ८० हजार हेलिकप्टरबाट ललितलाई काठमाडौँ ल्याउनका लागि लागेको खर्च सिम्रिक एयरलाई दिएर बाँकी रकम चार लाख २८ हजार सिप्यानका अध्यक्ष डा. मनिष राज पाण्डे तथा महासचिव र कोषाध्यक्ष पृथु बास्कोटाले ललितकी श्रीमतीलाई हस्तान्तरण गरे ।