मुम्बई विरुद्ध पहिले ब्याटिङ गर्दै बेंगलोर
इन्डियन प्रिमियर लिग (आईपीएल) को १० औं खेलमा भारतीय क्रिकेट टोलीका कप्तान बिराट कोहलीको कप्तानीमा रहेको रोयल च्यालेन्जर्स बेंगलोरले पहिले ब्याटिङ गर्ने भएको छ । दुबई अन्तरास्ट्रिय क्रिकेट मैदानमा भारतीय क्रिकेट टोलीका उपकप्तान रोहित शर्माको नेतृत्वमा रहेको मुम्बई इन्डियन्सले टस जित्दै बेंगलोरलाई ब्याटिङको निम्तो दिएको हो ।
मुम्बईले आजको खेलमा एक परिवर्तन गरेको छ भने बेंगलोरले तीन परिवर्तन गरेको छ । मुम्बईले चोटका कारण शौरभ तिवारी खेल्न नसक्ने भएका कारण उनको स्थानमा इशान किशानलाई स्थान दिएको छ । बेंगलोरले जस ह्याजलउड, डेल स्टेन र उमेश यादवको स्थानमा गुरकीरत सिंह, एडम जाम्पा र इसुरु उडानालाई सुरुवाती ११ मा स्थान दिएको छ ।
मुम्बई र बेंगलोरले अहिले सम्म एक आपससँग २७ खेल खेलेका छन् जसमा मुम्बईले १८ खेलमा जित हात पार्दा बेंगलोरले नौं खेल मात्र खेलेका छन् । दुई टोलीले २५ खेल आईपीएलमा तथा दुई खेल च्याम्पियन्स लिग ट्वान्टी ट्वान्टीमा खेलेका थिए ।
पछिल्लो पाँच खेलको नतिजालाई हेर्ने हो भने मुम्बईसँग बेंगलोर निरिह रहेको छ । पाँच खेलमा मुम्बईले बेंगलोरलाई चार पटक पराजित गरेको थियो भने एक खेलमा मात्र बेंगलोर हाबी रहेको थियो ।
मुम्बई र बेंगलोर दुबैले हाल सम्म समान २-२ खेल खेल्दै एकमा जित निकाल्दा अर्कोमा हारको सामना गरेका छन् । पहिलो खेलमा चेन्नाई सुपर किंग्ससँग पाँच विकेटले पराजित भएको मुम्बईले दोश्रो खेलमा कोलकाता नाइट राईडर्सलाई ४९ रनले पराजित गरेको हो । त्यस्तै पहिलो खेलमा सनराईजर्स हैदराबाद माथि १० रनको रोमान्चक जित हात पारेको बेंगलोरले दोश्रो खेलमा किंग्स ११ पन्जाबसँग ९७ रनको लज्जास्पद हार व्यहोर्यो ।
