मनिष पाण्डेको अर्धशतकको बाबजुद इन्डियन प्रिमियर लिग (आईपीएल) को सातौं खेलमा सनराईजर्स हैदराबादले कोलकाता नाइट राईडर्सलाई १४३ रनको मध्यम लक्ष्य दिएको छ ।
शेख जायद रंगशाला, अबुधबीमा खेलमा टस जितेर पहिले ब्याटिङ गरेको हैदराबादले पुरै २० ओभर खेल्दै चार विकेटको नोक्सानीमा १४२ रनको सानो योगफल बनाउन सक्यो ।
हैदराबादको तर्फबाट मनिष पाण्डेले सर्वाधिक ५१ रन बनाए । तेश्रो नम्बरमा ब्याटिङ गर्न आएका उनले ३८ बलको सामना गर्दै तीन चौका र दुई छक्का प्रहार गरे ।
हैदराबादले आजको खेलमा पनि राम्रो सुरुवात गर्न सकेन । ओपनर जोनी बेरस्टोव पाँच रनमा आउट भए भने अर्का ओपनर डेभिड वार्नर पनि ३० बलमा ३६ रन बनाएर आउट भए । रिद्दीमन शाहा पनि ३१ बलमा ३० रन बनाएर रन आउट भए भने मोहम्मद नाबी ११ रनमा अविजित रहे ।
कोलकाताका प्याट कमिन्सले किफायती बलिङ गर्दै चार ओभरमा मात्र १९ रन खर्चिएर एक विकेट लिए भने आन्द्रे रसेल र वरुण चक्रवर्तीले पनि १-१ विकेट नै आफ्नो नाममा दर्ता गराए ।
समान १-१ खेल खेलेका हैदराबाद र कोलकाता अंक तालिकामा अंक बिहिन रहेका छन् । आफ्नो पहिलो खेलमा हैदराबाद रोयल च्यालेन्जर्स बेंगलोरसँग १० रनले पराजित भएको थियो भने कोलकाता मुम्बई इन्डियन्ससँग ४९ रनको फराकिलो हारको सामना गर्न पुगेको थियो । त्यसैले पनि आजको खेलमा दुबै टोली जित हात पार्दै पहिलो अंक जोड्ने आशामा रहने छन् ।
कोलकाता र हैदराबाद हाल सम्म आईपीएलमा १७ पटक एक आपसमा भिडेका छन् । १० खेलमा कोलकाताले जित हात पार्दा हैदरबादले जम्मा सात खेल आफ्नो पक्ष्यमा पार्न सकेको छ । पछिल्लो पाँच खेलमा हैदराबादले तीन र कोलकाताले दुई खेल जितेका छन् ।
आफुले खेलेका दुबै खेलमा जित दर्ता गरेको दिल्ली क्यापिटल्स चार अंकका साथ अंक तालिकाको शिर्ष स्थानमा रहेको छ ।