सोमबार म्यानचेस्टर सिटीका ग्याब्रियल जिजसले उल्भ्सबिरुद्ध ९५ औं मिनेटमा गोल गरेसँगै इङ्गलिस प्रिमियर लिगको एक चरणमा भएका खेलहरुमा गोलको नयाँ किर्तिमान कायम भएको छ ।
शनिबार र आइतबारका संयुक्त आठ खेलहरुमा ३९ गोल हुदा उल्भ्स र एस्टन भिल्लाले पनि गोल गरेपछि पहिलो चरणको समाप्तिमा प्रिमियर लिगमा ४४ गोलको किर्तिमान बनेको छ । जिजसले अन्तिम समयमा गोल गर्दा म्यानचेस्टर सिटीले ३–१ को जित हात पारेको थियो ।
२० टिमको प्रिमियर लिगको शुरुवात भएयता एकै चरणमा सबैभन्दा बढी ४३ गोलको किर्तिमान सन् २०११ फेब्रुवरी ५ र ६ मा कायम भएको थियो । सोमबारको पहिलो खेलमा एस्टन भिल्लाले सेफिल्ड युनाइटेडलाई १–० ले हराएको थियो ।
शनिबार एकै दिन २७ गोलहरु भएका थिए जसमध्ये टोटेन्ह्यामले साउथ्याम्प्टन र एभर्टनले वेष्ट ब्रोमविच आल्बियनलाई समान ५–२ गोल अन्तरले हराएको थियो । यस्तै लिड्सले फुलह्यामलाई ४–३ र लेस्टर सिटीले बर्न्लीलाई ४–२ ले पराजित गरेको थियो ।