१७ बर्षिय अमेरिकी मिडफिल्डर जियो रेनाले जर्मन बुन्डेसलिगामा आफ्नो पहिलो गोल गर्दा बोरुसिया डर्टमण्डले बोरुसिया मोएनचेनग्लाडबाचलाई ३–० को फराकिलो अन्तरले पराजित गरेको छ ।
रेनाले अर्का १७ बर्षिय इङ्गल्याण्ड खेलाडी जुड बेलिङ्गमसँग वान–टु पास खेल्दै ग्लाडबाच गोलकिपर यान सोमरलाई बिट गरेका थिए । मार्चमा कोरोना भाइरसपछि खाली रँगशालामा खेल्दै आएको डर्टमण्डले शनिबार भने ९ हजार ३ सय समर्थकलाई प्रवेश दिएको थियो ।
रँगशालामा समर्थक फर्किनु निकै राम्रो कुरा हो र उनीहरुको अगाडी गोल गर्नु अझै राम्रो । हामीले राम्रो शुरुवात पाएको छौं, डर्टमण्डका लागि जनवरी १८ मा अस्बर्गबिरुद्धको खेलमा डेब्यु गरेपछि १६ खेलमा गोल गरेका रेनाले भने ।
१७ बर्ष, दुई महिना र पाँच दिनको उमेरमा रेना बुन्डेसलिगा खेल्ने सबैभन्दा कान्छो खेलाडी बनेका थिए । रेनाको लागि उत्कृष्ट रहेको दिनमा नर्वेजियन स्ट्राइकर एर्लिङ्ग हालान्डले बाकी दुई गोल गरेका थिए । रेनाले नै कमाएको पेनाल्टीमा हालान्डले पहिलो गोल गरेका थिए ।
हेलास भेरोनासँग एएस रोमा रोकियो
इटालियन सिरी आ को पहिलो दिन अघिल्लो सिजन पाचौं स्थानमा सक्काएको एएस रोमालाई हेलास भेरोनाले गोलरहित बराबरीमा रोक्यो । एडिन जेको बेञ्चमै बसेको खेलमा रोमाले उल्लेखनीय केही गर्न सकेन ।
बोस्नियन जेको युभेन्टस जाने हल्ला चल्दै आइरहेको छ । पहिलो हाफको शुरुवातमा रोमाले दबदबा कायम गरेपनि भेरोनाले घरेलु मैदानमा खेललाई नियन्त्रणमा लिन थालेको थियो । भेरोनाको दुई वटा प्रहार पोस्टमा लागेर फर्किएको थियो ।
अर्को खेलमा फियोरेन्टिनाले टोरिनोलाई १–० ले पराजित गर्यो । फ्रांक रिबेरीले पहिलो पटक कप्तानी गर्दा फियोरेन्टिनाका लागि गेटानो काष्ट्रोभिलिले गोल गरेका थिए ।
इटालीको खेलकुद मन्त्रालयले आइतबारदेखि फुटबल लगायत अन्य खुला मैदानमा खेलिने खेलहरुको लागि एक हजार समर्थकहरुलाई प्रवेश दिने बताउदै आएका छन् । ९ पटकको बिजेता युभेन्टसले लिगको आफ्नो पहिलो खेल समर्थकहरुकै उपस्थितिमा खेल्ने बताएको छ ।
टिन ट्रफर्टको ड्रिम डेब्यु
टिनेज डिफेण्डर एड्रियन ट्रफर्टले डेब्यु खेलमै गोल गरेपछि फ्रेञ्च लिग वानमा रेनेस मोनाकोलाई २–१ ले पराजित गर्दै अंक तालिकाको माथिल्लो स्थानमा पुगेको छ । फाइटाउट मोवासा घाइते भएपछि मात्रै १८ बर्षिय लेफ्ट ब्याक मैदान प्रवेश गर्न पाएका थिए ।
१–० ले पछि परेको स्थितिमा मात्र ९ मिनेट बाकी रहदा ट्रफर्टको सटिक क्रसमा फ्रेञ्च मिडफिल्डर स्टिभन एनजोन्जीले हेडर मार्फत गोल गर्दै बराबरी गरेका थिए । अतिरिक्त समयको दोश्रो मिनेटमा ट्रफर्टले गोल गर्दै रेनेसलाई बिजयी बनाए ।
रेनेसको १० अंक रहेको छ । शनिबारको खेलमा मोनाकोका लागि विसम बेन येदेरले २८ औं मिनेटमा गोल गर्दै टोलीलाई अग्रता दिलाएका थिए ।
