अस्ट्रेलियाले इंग्ल्यान्ड विरुद्धको तेश्रो तथा अन्तिम ट्वान्टी ट्वान्टी अन्तरास्ट्रिय खेल जित्नका लागि १४६ रनको मध्यम लक्ष्य पाएको छ ।
खेलमा टस हारेर पहिले ब्याटिङ गरेको इंग्ल्यान्डले पुरै २० ओभर खेल्दै छ विकेटको नोक्सानीमा १४५ रन बनायो ।
इंग्ल्यान्डको तर्फबाट ओपनिङमा आएका विकेट किपर ब्याट्सम्यान जोनी बेरस्टोवले सर्वाधिक ५५ रन बनाए । ४४ बलको सामना गरेका उनले समान ३-३ चौका र छक्का प्रहार गरे । बेरस्टोव बाहेक छैठौं नम्बरमा ब्याटिङ गर्न आएका जोए डेन्लीले पनि अविजित रहँदै १९ बलमा २८ रनको योगदान दिए ।
त्यस्तै ओईन मोर्गनको अनुपस्थितीमा इंग्ल्यान्डको कप्तानी गरेका मोएन अलीले २१ बलमा २३ रन, दाविद मालानले १८ बलमा २१ रनको पारी पारी खेले । त्यस बाहेक अन्य ब्याट्सम्यानले दोहोरो अंकमा रन जोड्न सकेनन् ।
अस्ट्रेलियाका लेग स्पिनर एडम जाम्पा महँगो साबित भए पनि सर्वाधिक दुई विकेट हात पारे । किफायती बलिङ गरेका तिब्र गतिका बलर मिचेल स्टार्कले चार ओभरमा मात्र १९ रन खर्चिएर एक विकेट आफ्नो नाममा दर्ता गराए ।
तीन खेलको शृंखलामा इंग्ल्यान्ड २-० ले अघि रहेको छ ।
आजको खेलमा जित हात पार्ने टोलीले ट्वान्टी ट्वान्टी वरियताको शिर्ष स्थानमा पकड जमाउने छ । अहिले अस्ट्रेलियासँग समान २७३ रेटिंङ पोइन्ट भए पनि इंग्ल्यान्ड वरियताको पहिलो स्थानमा रहेको छ । जुन टोलीले आजको खेल जित्ने छ उसले पहिलो स्थानमा पकड जमाउने छ ।
दोश्रो ट्वान्टी ट्वान्टी खेलमा अस्ट्रेलियालाई छ विकेटले पराजित गर्दै इंग्ल्यान्डले एक खेल अगावै अस्ट्रेलिया विरुद्धको ट्वान्टी ट्वान्टी शृंखला माथि कब्जा जमाइ सकेको थियो । पहिलो ट्वान्टी ट्वान्टी खेलमा इंग्ल्यान्डले दुई रनको रोमान्चक जित हात पारेको थियो ।
दोश्रो ट्वान्टी खेलमा जितका लागि १५८ रनको मध्यम लक्ष्य लिएर ब्याटिङमा उत्रिएको इंग्ल्यान्डले १८ दशमलब पाँच ओभर खेल्दै चार विकेटको नोक्सानी सहज जित हात पारेको थियो । त्यस्तै पहिलो ट्वान्टी ट्वान्टी खेलमा जितका लागि १६३ रनको मध्यम लक्ष्य पक्ष्याएको अस्ट्रेलियाले २० ओभरमा छ विकेट गुमाएर मात्र १६० रन बनाए पछि इंग्ल्यान्डले दुई रनको रोमान्चक जित हात पारेको हो ।