क्यारेबियन प्रिमियर लिग (सिपीएल) अन्तर्गत आफ्नो आठौं खेलमा नेपाली लेग स्पिनर सन्दिप लामिछाने सम्मिलित जमैका तल्वाजले सेन्ट किट्स एण्ड नेभिस प्याट्रियट्स विरुद्धको खेलमा टस जितेर पहिले बलिङ गर्ने निर्णय गरेको छ ।
जमैकाले सात खेलमा तीन जित र चार हार व्यहोरेको छ भने भने छ अंकका साथ अंक तालिकाको चौथों स्थानमा रहेको छ भने एक खेलम मात्र जित्न सकेको सेन्ट किट्स प्रतियोगिताबाट बाहिरी सकेको छ । आजको खेलमा जित हात पारेको खण्डमा जमैका समीफाइनल नजिक पुग्ने छ । तर उसले बाँकी दुई खेल मध्य एकमा जित निकाल्न पर्ने हुन्छ अन्यथा बार्बाडोस ट्राइडेण्ट्सले दुबै खेलमा पराजित हुन पर्नेछ ।
पहिलो लेगमा जमैकाले सेन्ट किट्स माथि ३७ रनको फराकिलो जित दर्ता गराएको थियो ।उक्त खेलमा सन्दिपले चार ओभर बलिङ गर्दै २७ रन खर्चिएर दुई विकेट हात पारेका थिए ।
सिपीएलको जारी सिजनमा सन्दिपले सातवटै खेल खेलेका छन् भने १० विकेट हात पार्न सफल भएका छन् । सन्दिपले विकेट मात्र हैन निकै किफायती बलिङ पनि प्रदर्शन गरेका छन् । २८ ओभर बलिङ गरेका सन्दिपले चार दशमलब आठ पाँच प्रति ओभरमा १३६ रन खर्चिएका छन् ।
सन्दिपले गायना एमेजन वारियर्स, बार्बाडोस ट्राइडेण्ट्स र सेन्ट किट्स विरुद्धको खेलमा समान २-२ विकेट हात पारेका थिए भने सेन्ट लुसिया जुक्स, गायना एमेजन वारियर्स तथा ट्रिन्बागो नाइट राईडर्स विरुद्दको दुबै खेलमा समान १-१ विकेट आफ्नो नाममा दर्ता गराएका थिए ।
जारी सिजनमा उनको सबैभन्दा राम्रो बलिङ प्रदर्शन भने गायना विरुद्धको खेलमा रहेको छ । उक्त खेलमा उनले चार ओभर बलिङ गर्दै मात्र आठ रन खर्चिएर दुई विकेट हात पारे ।
