रियल म्याड्रिडबाट आफ्नो बहिर्गमन कुरेर बसिरहेका वेल्स फर्वार्ड ग्यारेल बेल स्पेनिस क्लबले नै आफूलाई अन्यत्र जानका लागि निकै कठिन परिस्थिति सृजना गरिदिएको आरोप लगाएका छन् ।
प्रशिक्षक जिनेदिन जिदानको रोजाइमा नरहेका बेलले कारोना भाइरसपछि सुचारु भएको स्पेनिस ला लिगामा बाकी रहेको १२ खेलमा मात्र ४८ मिनेट खेलेका थिए । आफ्नो दुई कार्यकालमै बेलसँग सम्बन्ध बिग्रदा जिदानले वेल्स स्टार म्यानचेस्टर सिटीबिरुद्ध च्याम्पियन्स लिग अन्तिम १६ को दोश्रो लेगमा रियलका लागि खेल्न अनिच्छुक रहेको बताएका थिए ।
रियलसँगको सम्झौतामा अझै दुई बर्ष बाकी नै रहेपनि जिदान रहुन्जेल उनी ला लिगा च्याम्पियनका लागि खेल्ने सम्भावना निकै कम रहेको छ । अघिल्लो बर्ष ३१ बर्षिय बेल चाइनिज सुपर लिग टोली जियाङसु सुनिङसँगको सम्झौता नजिक पुगेका थिए तर रियलले अन्तिम क्षणमा हात झिकेको थियो । यो घटनाले बेललाई अहिले पनि चिढाउने गरेको छ ।
“क्लबले यसको बारे जवाफ दिनुपर्छ किनभने म अघिल्लो बर्ष नै छोड्न लागिरहेको थिए तर अन्ति सेकेण्डमा रियलले मेरो सम्झौतानै रोकिदियो,” बेलले भने । “म चाइनिज सुपर लिगमा जाने कुरालाई लिएर निकै उत्साहित थिए तर त्यो हुन सकेन । त्यस्ता अन्य अरु समयहरु पनि थिए जब म छोड्न चाहन्थे तर क्लबले कहिले हुन दिन्थेन कहिले आफै केही गरिदिदैन थियो ।”
“सबै कुरा आफू खेल्दै आएको क्लबको हात मै हुन्छ । हामीले सम्झौतामा हस्ताक्षर गरेको हुन्छौं । क्लबले नै सबै कुरा निकै कठिन बनाइदिएपछि चुप लागेर बस्ने बाहेक अन्य कुनै बिकल्प हुदैन,” उनले थपे ।
२०१३ मा इङ्गलिस प्रिमियर लिग क्लब टोटेन्ह्याम हटस्परबाट १ सय १३ मिलियन डलरमा रियल म्याड्रिड आउदा बेल संसारकै महँगो खेलाडी बनेका थिए । रियलका लागि उनले दुई ला लिगा उपाधि र चार च्याम्पियन्स लिग जितेका छन् । जिदानसँग उनको सम्बन्धमा तिक्तता बढ्दै जादा उनले सम्मान दिन नसकेको भन्दै बेल निकै आलोचित पनि हुदै आएका छन् ।
