लियोनेल मेस्सीको एजेन्ट समेत रहेका उनका बुवा होर्गेले बार्सिलोनाबाट सहज रुपमा रिलिज हुने उपाय खोजिरहदा प्रतिद्वन्दी क्लब रियल म्याड्रिडका कप्तान सर्जियो रामोसले अर्जेन्टाइन स्ट्राइकर क्याम्प नोउमै रहेको हेर्न चाहेका छन् ।
मेस्सीले क्लब छोड्ने बताएसँगै उनका बाबुले बुधवार क्याटलोनियामा क्लबका अधिकारीहरूसँग भेट्दै आफ्नो छोरालाई बार्सिलोनामा बस्न अब गार्हो भएको बताएका थिए । मेस्सीका बाबु र क्लबबीच पुरै दिन छलफल चलेको थियो । स्थानीय सञ्चार माध्यमले दुई पक्ष कुनै पनि सम्झौतामा पुग्न असमर्थ भएको दाबी गरेको थियो ।
मेस्सीले बार्सिलोनासँगको सम्झौतामा २०१९–२० को सिजनको अन्त्यमा फ्री ट्रान्सफरमा क्लब छोड्न मिल्ने लेखिए पनि क्लबले भने यो कुरामा सहमती गरेको छैन । खेलाडी र उनको पक्षले भने कोरोना भाईरसका कारण जुनमा सकिनु पर्ने सिजन अगस्टमा लम्बिएका कारण यो सम्झौता अझै वैध रहेको बताउदै आएको छ ।
तर बर्सिलोनाले भने ला लिगाको समर्थन लिदै यो सम्झौता जुनमा नै सकिएको बताएको छ । धेरै सञ्चार माध्यमहरुको अनुसार पनि वुधबारको बैठकले यही निर्णय लिने र लगत्तै मेस्सी म्यानचेस्टर सिटी जाने तयारीमा रहेको बताएको थियो ।
स्पेनी टोलीसँग नेसन्स कपको तयारीमा लागि रहदा गरिएको एक प्रश्नमा रामोसले मेस्सी बर्सिलोनामै बसेको हेर्न चाहेको बताए । “यो म्याड्रिडको लागि चिन्ताको विषय होइन । तर उनले आफ्नो भविष्यको निर्णय गर्ने अधिकार पाउनु पर्छ,” रामोसले भने ।
“मलाई थाहा छैन उनले राम्रोसँग प्रदर्शन गरिरहेको छन् कि छैनन् तर पक्कै पनि स्पेनिस फुटबल, बार्सिलोना र हामी म्याड्रिडको लागि मेस्सी यही बसेको हेर्न चाहन्छौ,” उनले थपे । “यसले ला लिगा र उनको टोलीलाई अझ राम्रो बनाउँछ र एल क्लासिकोलाई अझ सुन्दर बनाउने छ । हामीले के हुनेछ हेर्ने मात्र हो । र हाम्रो लागि यो चिन्ताजनक समाचार पनि होइन” रामोसले भने ।
