चेन्नई सुपर किंग्सका व्याट्स्म्यान सुरेश रैना यो सिजनको इण्डियन प्रिमियर लिगको पुरै सिजन नै नखेल्ने निर्णय गर्दै युएई छोड्दा सबै अचम्ममा परेका थिए ।
शुरुवातमा रैनाले आईपिएल छोड्नुको कारण नितान्त व्यक्तिगत भनिएपनि एक रिपोर्टले कप्तान महेन्द्र सिँह धोनीसँगको मनमुटावका कारण उनले प्रतियोगिता त्यागेको उल्लेख गरेको छ । चेन्नई फ्रान्चाइजले स्वामित्व ग्रहण गरेको इण्डिया सिमेन्ट्सका अध्यक्ष एन श्रीनिभासनले रैनालाई सफलताको मात लागेको बताएका छन् ।
अगष्ट २० मा पठानकोटमा रहेको रैनाको फुपुको घरमा भएको हत्याकाण्डका कारण रैनाले आईपिएल छोडेको भनिएपनि यो पूर्ण रुपमा सत्य नहुन सक्छ । उक्त हत्याकाण्डमा रैनाको फुपुको श्रीमानको त्यही दिन मृत्यु भएको थियो भने उनका भाइको केही दिनपछि अस्पतालमा मृत्यु भएको थियो । उनको फुपुको परिवारका अन्य सदस्यहरु पनि नराम्ररी घाइते भएका छन् ।
आउटलुकको एक रिपोर्ट अनुसार रैना युएईमा आफूलाई दिइएको होटल रुमलाई लिएर असन्तुष्ट थिए । खेलाडीहरुको लागि निर्धारण गरिएका बायो बबल नियमहरु महामारीको क्रममा सुहाउदो नरहेको र उनलाई कप्तान धोनी जसरी नै बाल्कोनी भएको रुमा चाहिएको रैनाले बताएको आउटलुकले लेखेको छ ।
श्रीनिभासनका अनुसार रैनाले छोड्दा पुरै टिम स्तब्ध भएको तर धोनी भने आफ्नो संयममै रहेका थिए । “खेलाडीहरु भनेको पुरानो समयमा आफ्नो नियन्त्रण गुमाउने गरेका नायकहरु जस्तै हुन्छन् । चेन्नई सुपर किंग्स एक परिवारको रुपमा रहदै आएको छ र सिनियर खेलाडीहरु एक अर्कासँग खुलेर बस्न सिकेका छन्,” श्रीनिभासनले भने ।
“मलाई के लाग्छ भने यदि तपाई इच्छुक हुनुहुन्न वा खुशी हुनुहुन्न भने फर्कदा हुन्छ । मैले कसैले कुनै कुरा गर्न कर गरेको छैन । कहिले काही सफलता टाउको माथि चढ्ने गर्छ,” श्रीनिभासनले भने । उनले रैना फर्कन सक्ने पनि बताए । “सिजन अहिले शुरु भइसकेको छैन र मलाई लाग्छ रैनाले आफूले छुट्टाउन सक्ने कुरा (क्रिकेट) र पैसाको बारेमा बुझ्नेछन् ।”
रैनाले हरेक सिजन चेन्नईबाट ११ करोड भारतीय रुपैया लिने गरेका छन् । गत शनिबार चेन्नईले एक ट्विट गर्दै रैना भारत फर्किएको र फ्रान्चाइजले उनी र उनको परिवारलाई पूर्ण रुपमा समर्थन गर्ने बताएका थिए ।
